గోల్డ్ లోన్ తీసుకున్నవారికి అలర్ట్...కొత్త రుణాలపై ఆంక్షలు!

భారత్‌లో గోల్డ్ లోన్ మార్కెట్‌పై ఒత్తిడి పెరుగుతోంది. బంగారాన్ని హామీగా తీసుకుని ఇచ్చిన రుణాలను తిరిగి వసూలు చేసుకోవడంలో బ్యాంకులు, బ్యాంకింగేతర ఆర్థిక సంస్థలు (ఎన్‌బీఎఫ్‌సీలు) సవాళ్లను ఎదుర్కొంటున్నాయి. ప్రస్తుతం రుణ చెల్లింపుల వైఫల్యాలు ఆందోళనకర స్థాయికి చేరకపోయినప్పటికీ, భవిష్యత్తులో తలెత్తే ప్రమాదాలపై ఆర్థిక సంస్థలు అప్రమత్తమవుతున్నాయి. బకాయిలు చెల్లించని ఖాతాదారులకు కొత్తగా గోల్డ్ లోన్లు ఇవ్వడాన్ని పిరామల్ ఫైనాన్స్ నిలిపివేసినట్లు సమాచారం. మరోవైపు, స్వల్పకాలిక గోల్డ్ లోన్లను నిలిపివేయనున్నట్లు బజాజ్ ఫైనాన్స్ ప్రకటించింది.

గత ఏడాది బంగారం, వెండి ధరలు భారీగా పెరగడంతో బ్యాంకులు, ఎన్‌బీఎఫ్‌సీలు పెద్ద ఎత్తున గోల్డ్ లోన్లు మంజూరు చేశాయి. ప్రస్తుత ఆర్థిక సంవత్సరంలో ఆగస్టు నాటికి బ్యాంకులు రూ.5.6 లక్షల కోట్ల విలువైన బంగారు రుణాలను జారీ చేశాయి. గత ఏడాది ఇదే కాలంతో పోలిస్తే ఇది 83 శాతం అధికం. ఎన్‌బీఎఫ్‌సీలు కూడా రూ.3.6 లక్షల కోట్ల రుణాలను అందించాయి. ఇది గత ఏడాదితో పోలిస్తే 69 శాతం పెరుగుదల. అయితే, ఈ ఏడాది జనవరిలో నమోదైన గరిష్ఠ స్థాయులతో పోలిస్తే విలువైన లోహాల ధరలు 50 శాతం వరకు పడిపోయినట్లు కథనం పేర్కొంది. దీంతో రుణాల చెల్లింపుల్లో ఇబ్బందులు పెరుగుతున్నాయి. గడువు ముగిసిన 90 రోజుల తర్వాత కూడా తమ గోల్డ్ లోన్లలో 15 నుంచి 23 శాతం వరకు బకాయిలు వసూలు కాలేదని పిరామల్ ఫైనాన్స్ వెల్లడించినట్లు సమాచారం.

గోల్డ్ లోన్ మార్కెట్‌లో ప్రమాదాలను తగ్గించేందుకు భారతీయ రిజర్వ్ బ్యాంక్ (ఆర్‌బీఐ) గత ఏడాది జూన్‌లో మార్గదర్శకాలను ప్రకటించింది. వాటి ప్రకారం, రూ.2.5 లక్షల వరకు రుణాలకు బంగారం విలువలో గరిష్ఠంగా 85 శాతం, రూ.2.5 లక్షల నుంచి రూ.5 లక్షల వరకు రుణాలకు 80 శాతం, రూ.5 లక్షలకు మించిన రుణాలకు 75 శాతం వరకు మాత్రమే రుణం ఇవ్వాలి. ఈ నిబంధనలు ఈ ఏడాది ఏప్రిల్ నుంచి అమల్లోకి వచ్చాయి. దీంతో గోల్డ్ లోన్ల జారీ వేగం కొంత తగ్గింది. అయినప్పటికీ, ఈ రంగం వేగంగా విస్తరిస్తోంది. 2028 మార్చి నాటికి దేశంలోని బ్యాంకులు, ఎన్‌బీఎఫ్‌సీల గోల్డ్ లోన్ల మొత్తం రూ.30 లక్షల కోట్లకు చేరవచ్చని ఇక్రా రేటింగ్ సంస్థ అంచనా వేసింది.