ప్రపంచ మార్కెట్‌లో ఐఫోన్‌ 17 సత్తా..

మెమరీ చిప్‌ ధరలు పెరగడంతో స్మార్ట్‌ఫోన్‌ తయారీ వ్యయాలు, ధరలు పెరిగి ప్రపంచవ్యాప్తంగా డిమాండ్‌ తగ్గింది. అయితే ఈ ప్రభావం యాపిల్‌పై పెద్దగా కనిపించలేదు. మార్కెట్‌ పరిశోధనా సంస్థ కౌంటర్‌పాయింట్‌ నివేదిక ప్రకారం.. ఈ ఏడాది రెండో త్రైమాసికంలో ప్రపంచంలో అత్యధికంగా అమ్ముడైన స్మార్ట్‌ఫోన్‌గా ఐఫోన్‌ 17 నిలిచింది. రెండో స్థానంలో ఐఫోన్‌ 17 ప్రో మ్యాక్స్‌, మూడో స్థానంలో ఐఫోన్‌ 17 ప్రో ఉన్నాయి. ఐఫోన్‌ 17ఈ ఏడో స్థానంలో, ఐఫోన్‌ 16 పదో స్థానంలో నిలిచాయి. దీంతో ప్రపంచ టాప్‌-10 బెస్ట్‌ సెల్లింగ్‌ స్మార్ట్‌ఫోన్లలో ఐదు మోడళ్లు యాపిల్‌వే కావడం విశేషం.

ప్రపంచవ్యాప్తంగా స్మార్ట్‌ఫోన్‌ అమ్మకాలు తగ్గాయని కౌంటర్‌పాయింట్‌ తెలిపింది. ధరలు పెరగడంతో డిమాండ్‌ బలహీనపడినట్లు పేర్కొంది. గతేడాదితో పోలిస్తే ఈ ఏడాది రెండో త్రైమాసికంలో యూరప్‌ షిప్‌మెంట్లు 10 శాతం తగ్గగా.. భారత్‌లో అమ్మకాలు 14 శాతం మేర క్షీణించాయి. చైనాలోనూ మార్కెట్‌ పరిస్థితులు సవాలుగా మారాయి. మరోవైపు యాపిల్‌ యూనిట్‌ సేల్స్‌ ప్రపంచవ్యాప్తంగా 6 శాతం పెరిగాయి. భారత్‌, జపాన్‌, పశ్చిమాసియా, ఆఫ్రికాలో అమ్మకాలు వృద్ధి చెందగా.. దక్షిణ కొరియాలో దాదాపు రెండింతలయ్యాయి. ఐఫోన్‌ 17లో చేసిన అప్‌గ్రేడ్లతో ప్రీమియం మోడళ్లతో వ్యత్యాసం తగ్గడం, ప్రచార కార్యక్రమాలు, ట్రేడ్‌-ఇన్‌ పథకాలు, ఈఎంఐ సదుపాయాలు యాపిల్‌ అమ్మకాలకు ఊతమిచ్చాయి.