ఆధునిక హంగులతో సిట్రోయెన్‌ పాత కారు

ఫ్రెంచ్‌ కార్ల తయారీ సంస్థ సిట్రోయెన్‌ తన ఐకానిక్‌ 2 CV కారును ఆధునిక రూపంలో తిరిగి తీసుకొచ్చేందుకు సిద్ధమవుతోంది. 2026 పారిస్‌ మోటార్‌ షోలో ఈ కారు ఆధారంగా రూపొందించిన కొత్త కాన్సెప్ట్‌ను సంస్థ ప్రదర్శించింది. హ్యాచ్‌బ్యాక్‌, పికప్‌ వెర్షన్లలో అందుబాటులోకి రావచ్చని సమాచారం. 1948లో తొలిసారిగా పరిచయమైన 2 CV తక్కువ ధర, సరళమైన రూపకల్పన, రోజువారీ అవసరాలకు అనువైన పనితీరుతో గుర్తింపు పొందింది. కొత్త కాన్సెప్ట్‌ 3.76 మీటర్ల పొడవుతో, గుండ్రటి హెడ్‌ల్యాంపులు, వంపుల రూఫ్‌లైన్‌, 8 అంగుళాల టచ్‌స్క్రీన్‌, విశాలమైన సీట్లు, ఫ్యాబ్రిక్‌ సన్‌రూఫ్‌, తొలగించగల నిల్వ బుట్ట వంటి ప్రత్యేకతలను కలిగి ఉంది.

కారు బరువును సుమారు ఒక టన్ను లోపే ఉంచి, బ్యాటరీ, తయారీ ఖర్చులను నియంత్రించాలని సిట్రోయెన్‌ భావిస్తోంది. ఇది ఎలక్ట్రిక్‌ కారుగా వచ్చే అవకాశం ఉన్నప్పటికీ, బ్యాటరీ సామర్థ్యం, ప్రయాణ పరిధి, ఛార్జింగ్‌ సమయంపై వివరాలు వెల్లడించలేదు. యూరప్‌లో ప్రారంభ ధర సుమారు 15,000 యూరోలు, అంటే దాదాపు రూ.16 లక్షలు ఉండొచ్చని అంచనా. భారత్‌లో విడుదల తేదీ, ధరపై అధికారిక ప్రకటన రావాల్సి ఉంది. ఇదిలా ఉండగా, సిట్రోయెన్‌ మాతృసంస్థ స్టెల్లాంటిస్‌ భారత్‌లో అదనంగా రూ.4,000 కోట్ల పెట్టుబడి పెట్టాలని యోచిస్తోంది. 2030 నాటికి మొత్తం పెట్టుబడులను రూ.15,000 కోట్లకు చేర్చాలని లక్ష్యంగా పెట్టుకుంది.