భగ్గుమన్న ముడి చమురు ధరలు

పశ్చిమాసియాలో ఉద్రిక్తతలు కొనసాగుతుండటం, అమెరికా-ఇరాన్ మధ్య శాంతి ఒప్పందంపై అనిశ్చితి నెలకొనడంతో అంతర్జాతీయ మార్కెట్లో ముడి చమురు ధరలు మరోసారి పెరిగాయి. బుధవారం బ్రెంట్ క్రూడాయిల్ ధర బ్యారెల్‌కు 110 డాలర్ల స్థాయిని దాటింది. చమురు సరఫరాకు ఆటంకాలు ఏర్పడవచ్చనే ఆందోళనలు, దౌత్యపరమైన చర్చల్లో పురోగతి లేకపోవడం ధరల పెరుగుదలకు కారణమయ్యాయి.

బుధవారం బ్రెంట్ క్రూడాయిల్ ధర బ్యారెల్‌కు 110.15 డాలర్లకు చేరింది. గత సెషన్‌తో పోలిస్తే ఒక శాతానికి పైగా పెరిగింది. మరోవైపు, అమెరికా ముడి చమురు ప్రమాణమైన వెస్ట్ టెక్సాస్ ఇంటర్మీడియట్ (డబ్ల్యూటీఐ) ధరలు కూడా అధిక స్థాయిలో కొనసాగాయి. మంగళవారం డబ్ల్యూటీఐ ధర బ్యారెల్‌కు 101.79 డాలర్ల వద్ద ముగిసింది. అంతకుముందు సెషన్‌లో ధరలు కొంత తగ్గినా, తాజా భౌగోళిక రాజకీయ పరిణామాలతో మళ్లీ పెరిగాయి.

ఇరాన్‌తో శాంతి ఒప్పందం కుదుర్చుకోవడం చాలా కష్టమని అమెరికా విదేశాంగ మంత్రి మార్కో రూబియో వ్యాఖ్యానించారు. హోర్ముజ్ జలసంధిలో వాణిజ్య నౌకలపై దాడులు ఆగే వరకు ఇరాన్‌పై ఆర్థిక ఒత్తిడి కొనసాగుతుందని స్పష్టం చేశారు. మరోవైపు, అమెరికా తమ షరతులను అంగీకరించే వరకు హోర్ముజ్ జలసంధిని తిరిగి తెరిచేది లేదని ఇరాన్ విదేశాంగ మంత్రి అబ్బాస్ అరాగ్చీ తెలిపారు. అణు పదార్థాలను రష్యా ఆధీనంలోకి అప్పగించాలన్న ప్రతిపాదనలను కూడా ఇరాన్ తిరస్కరించడంతో ఇరు దేశాల మధ్య చర్చలపై అనిశ్చితి మరింత పెరిగింది.