దీపావళి తర్వాత వినియోగ వస్తువుల ధరలు పెరిగే అవకాశం

వేగంగా అమ్ముడయ్యే వినియోగ వస్తువుల (ఎఫ్‌ఎంసీజీ) కంపెనీలకు ప్రస్తుత ఆర్థిక సంవత్సరం రెండో త్రైమాసికం (క్యూ2) ఆశించిన స్థాయిలో కలిసి రాలేదు. పామాయిల్‌, చక్కెర వంటి కీలక ముడి పదార్థాల ధరలు 18 నుంచి 21 శాతం వరకు పెరగడంతో కంపెనీల ఉత్పత్తి వ్యయాలు అధికమయ్యాయి. అయితే ధరలను పెంచితే వినియోగదారుల కొనుగోళ్లు తగ్గే ప్రమాదం ఉందన్న ఆందోళనతో కంపెనీలు సెప్టెంబరుతో ముగిసిన త్రైమాసికంలో ధరల పెంపునకు దూరంగా ఉన్నాయి. దీంతో గత ఏడాది ఇదే కాలంతో పోలిస్తే ఈ క్యూ2లో ఎఫ్‌ఎంసీజీ కంపెనీల లాభాల మార్జిన్లపై ఒత్తిడి పెరిగింది. లాభాల మార్జిన్లు 0.45 శాతం వరకు తగ్గినట్లు మార్కెట్‌ వర్గాల అంచనాలు సూచిస్తున్నాయి.

ముడి పదార్థాల ధరల పెరుగుదల ప్రభావం ఇంకా కొనసాగుతుండటంతో పండగ సీజన్‌ అమ్మకాలు దెబ్బతినకుండా దీపావళి తర్వాత ధరలను పెంచే దిశగా కంపెనీలు ఆలోచిస్తున్నాయి. అయితే సాధారణ వినియోగదారులు ఎక్కువగా కొనుగోలు చేసే ఉత్పత్తుల ధరలను పెంచడం కంపెనీలకు సవాలుగా మారింది. ధరలు అధికంగా పెంచితే డిమాండ్‌ తగ్గే అవకాశం ఉండటంతో, ధరల పెంపునకు బదులుగా ఖర్చులను నియంత్రించడం, ప్యాకెట్ల పరిమాణాన్ని తగ్గించడం వంటి ప్రత్యామ్నాయ చర్యలకు కంపెనీలు ప్రాధాన్యత ఇచ్చే అవకాశం ఉందని మార్కెట్‌ నిపుణులు భావిస్తున్నారు.