భారత్‌ వేగంగా వృద్ధి సాధించాలి.. యువత ఉపాధిపై నౌరియల్‌ రౌబినీ కీలక వ్యాఖ్యలు

2008 ప్రపంచ ఆర్థిక సంక్షోభాన్ని ముందుగానే అంచనా వేసిన ఆర్థికవేత్త నౌరియల్‌ రౌబినీ భారత ఆర్థిక వ్యవస్థ భవిష్యత్తుపై ఆశాభావం వ్యక్తం చేశారు. రాబోయే దశాబ్దాల్లో ప్రపంచంలోని అతిపెద్ద ఆర్థిక శక్తుల్లో ఒకటిగా భారత్‌ ఎదిగే అవకాశం ఉందని పేర్కొన్నారు. అయితే, దేశంలోని యువతకు తగినన్ని నాణ్యమైన ఉద్యోగాలు కల్పించాలంటే ఆర్థిక వృద్ధి రేటును 9 శాతానికి పెంచుకోవాల్సిన అవసరం ఉందని అభిప్రాయపడ్డారు. దేశీయ మార్కెట్‌ విస్తృతి, నైపుణ్యమున్న మానవ వనరులు, స్థూల ఆర్థిక పరిస్థితులు భారత్‌ దీర్ఘకాలిక వృద్ధికి దోహదపడతాయని వివరించారు. 7 శాతం వృద్ధి మాత్రమే సరిపోదని, యువతకు మెరుగైన ఉపాధి అవకాశాలు కల్పించేందుకు మరింత వేగవంతమైన వృద్ధి అవసరమని అన్నారు.

ప్రపంచ వాణిజ్య సంబంధాల్లో వస్తున్న మార్పులు భారత్‌కు కొత్త పెట్టుబడుల అవకాశాలను అందించవచ్చని రౌబినీ పేర్కొన్నారు. చైనాపై ఆధారపడటాన్ని తగ్గించాలనుకుంటున్న అంతర్జాతీయ కంపెనీలు ఎలక్ట్రానిక్స్‌, ఆటోమొబైల్స్‌, సెమీకండక్టర్ల వంటి రంగాల్లో ప్రత్యామ్నాయ తయారీ కేంద్రాలను అన్వేషిస్తున్నాయని తెలిపారు. పెద్ద దేశీయ మార్కెట్‌, అమెరికాతో వాణిజ్య సంబంధాలు భారత్‌కు అనుకూలంగా మారవచ్చన్నారు. అయితే, జనాభా ఎక్కువగా ఉండటం మాత్రమే ఆర్థిక ప్రయోజనాలను అందించదని, తగినన్ని ఉద్యోగాలను సృష్టించడం కీలకమని స్పష్టం చేశారు. కృత్రిమ మేధ వల్ల ఉద్యోగాల స్వరూపం మారుతున్న నేపథ్యంలో, తయారీ రంగం, లాజిస్టిక్స్‌, సరఫరా వ్యవస్థల్లో ఉపాధిని విస్తరించాల్సిన అవసరం ఉందన్నారు. కొనసాగుతున్న సంస్కరణలు దేశ వృద్ధి సామర్థ్యాన్ని 8 శాతానికి మించి తీసుకెళ్లగలవని ఆయన విశ్వాసం వ్యక్తం చేసినట్లు నివేదిక పేర్కొంది.