బెంగళూరు నుంచి స్విట్జర్లాండ్‌కు డైరెక్ట్ ఫ్లైట్‌.. స్విస్‌ కీలక ప్రకటన

దక్షిణ భారతదేశం నుంచి స్విట్జర్లాండ్‌కు తొలి నాన్‌స్టాప్ విమాన సర్వీసును స్విస్ ఇంటర్నేషనల్ ఎయిర్ లైన్స్ (SWISS) అక్టోబర్ 28, 2026 నుంచి ప్రారంభించనుంది. బెంగళూరులోని కెంపేగౌడ అంతర్జాతీయ విమానాశ్రయం నుంచి జ్యూరిచ్ విమానాశ్రయానికి ఈ సర్వీసు నడపనుంది. వారానికి ఐదు రోజులు ఇరువైపులా విమానాలు అందుబాటులో ఉంటాయి. బెంగళూరు నుంచి తొలి విమానం అక్టోబర్ 28న తెల్లవారుజామున 4:50 గంటలకు బయలుదేరి, అదే రోజు ఉదయం 10:50 గంటలకు జ్యూరిచ్ చేరుకుంటుంది. జ్యూరిచ్ నుంచి తొలి విమానం అక్టోబర్ 27న మధ్యాహ్నం 1:20 గంటలకు బయలుదేరి, మరుసటి రోజు తెల్లవారుజామున 2:55 గంటలకు బెంగళూరుకు చేరుకుంటుంది. ఈ కొత్త మార్గంతో ఢిల్లీ, ముంబై తర్వాత భారత్‌లో స్విస్ సేవలు అందించే మూడో నగరంగా బెంగళూరు నిలవనుంది.

ఈ నాన్‌స్టాప్ సర్వీసు వల్ల వ్యాపార ప్రయాణికులతో పాటు స్విట్జర్లాండ్‌కు విహారయాత్రలకు వెళ్లేవారికి ప్రయాణ సమయం తగ్గే అవకాశం ఉంది. బెంగళూరులోని టెక్నాలజీ, ఇన్నోవేషన్ రంగాలకు చెందిన వ్యాపారవేత్తలకు కూడా ఈ కనెక్టివిటీ ఉపయోగపడనుంది. జ్యూరిచ్ విమానాశ్రయం ద్వారా యూరప్‌లోని ఇతర నగరాలతో పాటు ఉత్తర అమెరికాకు వెళ్లేందుకు కూడా అనుసంధాన విమానాలు అందుబాటులో ఉంటాయి. స్విట్జర్లాండ్‌కు వెళ్లే భారతీయ ప్రయాణికులు షెంగెన్ వీసా నిబంధనలను పాటించాలి. వీసా దరఖాస్తులు భారత్‌లోని స్విస్ రాయబార కార్యాలయ వ్యవస్థ ద్వారా నిర్వహించబడతాయి.