లేక్‌ ఒంటారియో పేరుపై ట్రంప్‌ కొత్త డిమాండ్‌

అమెరికా అధ్యక్షుడు డొనాల్డ్‌ ట్రంప్‌ మరోసారి భౌగోళిక పేరు మార్పుపై దృష్టి పెట్టారు. అమెరికా, కెనడా మధ్య ఉన్న లేక్‌ ఒంటారియో పేరును అమెరికాలో ‘లేక్‌ అమెరికా’గా మార్చిన తర్వాత, ఆ పేరును ఆపిల్‌ మ్యాప్స్‌లోనూ అమలు చేయాలని ట్రంప్‌ ఆ సంస్థను కోరినట్లు అమెరికా అంతర్గత వ్యవహారాల కార్యదర్శి డగ్‌ బర్గమ్‌ తెలిపారు. ట్రంప్‌ స్వయంగా ఆపిల్‌ను సంప్రదించారని ఆయన వెల్లడించారు.

అమెరికా జియోగ్రాఫిక్‌ నేమ్స్‌ ఇన్ఫర్మేషన్‌ సిస్టమ్‌ (GNIS)లో లేక్‌ ఒంటారియో పేరును ‘లేక్‌ అమెరికా’గా మార్చేందుకు ట్రంప్‌ ఆగస్టు 27న ఉత్తర్వులు జారీ చేశారు. ఈ మార్పును గూగుల్‌ మ్యాప్స్‌ అమెరికా వినియోగదారులకు అమలు చేసింది. అయితే కెనడాలో మాత్రం ఈ సరస్సు ‘లేక్‌ ఒంటారియో’గానే కనిపిస్తోంది. అమెరికా ప్రభుత్వం తీసుకున్న ఈ నిర్ణయం కెనడా పేరు విధానాలను మార్చదు.

ఆపిల్‌ మ్యాప్స్‌లో మాత్రం సోమవారం నాటికి ‘లేక్‌ ఒంటారియో’ పేరే కనిపిస్తోంది. ట్రంప్‌ తాజా విజ్ఞప్తిపై ఆపిల్‌ అధికారికంగా స్పందించలేదు. అమెరికా–కెనడా మధ్య వాణిజ్య ఉద్రిక్తతలు కొనసాగుతున్న సమయంలో ఈ పేరు మార్పు వ్యవహారం మరోసారి చర్చనీయాంశంగా మారింది. అమెరికాలో పేరును మార్చే అధికారం ఉన్నప్పటికీ, కెనడాలోనూ అదే పేరును అమలు చేయించే అధికారం అమెరికాకు లేదని అధికారులు స్పష్టం చేస్తున్నారు.