గల్ఫ్ ఆఫ్ అమెరికా తర్వాత అట్లాంటిక్‌పై ట్రంప్ కన్ను

అట్లాంటిక్ మహాసముద్రం పేరును “అమెరికన్ ఓషన్”గా మార్చాలన్న తన ప్రతిపాదనకు గూగుల్ సీఈఓ సుందర్ పిచాయ్ అంగీకరించలేదని అమెరికా అధ్యక్షుడు డొనాల్డ్ ట్రంప్ తెలిపారు. ఇటీవల టెన్నిస్సీ రాష్ట్రంలో జరిగిన ఓ కార్యక్రమంలో మాట్లాడిన ట్రంప్.. సముద్రం పేరును మార్చాలని తాను సూచించినప్పుడు పిచాయ్ అందుకు అభ్యంతరం తెలిపినట్లు చెప్పారు. సముద్రాలు అనేక దేశాలతో ముడిపడి ఉంటాయని, వాటి పేర్ల మార్పు సాధారణ విషయం కాదని పిచాయ్ తనతో చెప్పినట్లు ట్రంప్ వివరించారు. తాను పదవి నుంచి దిగిపోయేలోపు అట్లాంటిక్ మహాసముద్రం పేరును మార్చాలని భావిస్తున్నట్లు కూడా ఆయన వ్యాఖ్యానించారు. అమెరికా పేరుతో ఓ సముద్రం ఉంటే బాగుంటుందని ఎవరో సూచించారని, ఆ ఆలోచన తనకు నచ్చిందని ట్రంప్ సరదాగా చెప్పుకొచ్చారు.

ఇటీవల గల్ఫ్ ఆఫ్ మెక్సికో పేరును “గల్ఫ్ ఆఫ్ అమెరికా”గా మార్చాలని ట్రంప్ ప్రభుత్వం చర్యలు చేపట్టిన నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి. అమెరికా, కెనడా సరిహద్దులో ఉన్న ఓంటారియో సరస్సు పేరుకు సంబంధించి కూడా గూగుల్ మ్యాప్స్‌లో ప్రాంతాలవారీగా పేర్లు కనిపిస్తున్నాయని నివేదికలు పేర్కొన్నాయి. అమెరికాలోని వినియోగదారులకు “లేక్ అమెరికా”గా, కెనడాలోని వినియోగదారులకు “లేక్ ఓంటారియో”గానే పేరు కనిపిస్తుందని సమాచారం. ఇతర దేశాల్లోని వినియోగదారులకు “లేక్ ఓంటారియో” పక్కన కుండలీకరణాల్లో “లేక్ అమెరికా” పేరు కనిపించవచ్చని గూగుల్ తెలిపినట్లు నివేదిక పేర్కొంది. అయితే, మ్యాప్స్‌లో ప్రాంతాన్ని బట్టి పేరు చూపించడం, అంతర్జాతీయంగా అధికారికంగా పేరు మారడం రెండూ వేర్వేరు అంశాలు. అట్లాంటిక్ మహాసముద్రం పేరు మార్పుపై ట్రంప్ చేసిన తాజా వ్యాఖ్యలు ఇప్పుడు చర్చనీయాంశంగా మారాయి.