సాంకేతిక లోపంతో ఎయిర్ అంబులెన్స్‌ అత్యవసర ల్యాండింగ్‌...మహిళ మృతి

అగర్తల నుంచి కోల్‌కతాకు వెళ్తున్న ఎయిర్ అంబులెన్స్‌లో సాంకేతిక లోపం తలెత్తడంతో విమానాన్ని బంగ్లాదేశ్ రాజధాని ఢాకాకు మళ్లించి అత్యవసరంగా ల్యాండ్ చేశారు. విమానంలో అనారోగ్యంతో బాధపడుతున్న 56 ఏళ్ల అంజనా భౌమిక్‌ను మెరుగైన వైద్యం కోసం కోల్‌కతాకు తరలిస్తున్నారు. ప్రయాణం మధ్యలో విమాన తలుపు పాక్షికంగా తెరుచుకున్నట్లు సమాచారం. దీంతో సిబ్బంది విమానాన్ని ఢాకాలో దించారు.

ల్యాండింగ్ అనంతరం అంజనా భౌమిక్‌ను అక్కడి ప్రభుత్వ ఆసుపత్రికి తరలించగా, ఆమె మృతి చెందినట్లు వైద్యులు వెల్లడించారు. ఆమె మరణానికి గల కారణాలు ఇంకా తెలియరాలేదు. అత్యవసర ల్యాండింగ్‌కు, ఆమె మృతికి మధ్య సంబంధం ఉందా అనే విషయం కూడా స్పష్టంకావాల్సి ఉంది. ముందస్తు అనుమతి లేకపోయినా మానవతా దృక్పథంతో భారతీయ విమానాన్ని ల్యాండ్ అయ్యేందుకు బంగ్లాదేశ్ అధికారులు అనుమతించినట్లు అక్కడి వార్తా సంస్థలు పేర్కొన్నాయి.