కూటమి పార్టీల ఫోకస్.. రెబల్ అభ్యర్థుల ఉపసంహరణకు ప్రయత్నాలు

ఆంధ్రప్రదేశ్‌లో మున్సిపల్ ఎన్నికల నేపథ్యంలో నామినేషన్ల ఉపసంహరణపై కూటమి సమన్వయ కమిటీలు ప్రత్యేక దృష్టి సారించాయి. రేపు మధ్యాహ్నం 3 గంటల వరకు నామినేషన్ల ఉపసంహరణకు గడువు ఉండటంతో, టీడీపీ, జనసేన, బీజేపీ పార్టీల మధ్య నెలకొన్న పోటీని తగ్గించేందుకు నేతలు ప్రయత్నిస్తున్నారు. ముఖ్యంగా మేయర్, మున్సిపల్ చైర్మన్ స్థానాల్లో కూటమి పార్టీల అభ్యర్థుల మధ్య పోటీకి తెరదించి, అధికారిక అభ్యర్థులకు మద్దతు కూడగట్టడంపై దృష్టి పెట్టారు. విశాఖపట్నం, విజయనగరం, ఏలూరు కార్పొరేషన్లతో పాటు పలు మున్సిపాలిటీలు, నగర పంచాయతీల్లో ఈ ప్రయత్నాలు ముమ్మరంగా సాగుతున్నాయి.

కూటమి పార్టీల తరఫున బీఫామ్ పొందిన అభ్యర్థులకే అధికారిక అభ్యర్థులుగా గుర్తింపు లభించనుంది. ఈ నేపథ్యంలో నామినేషన్ల ఉపసంహరణ గడువు ముగిసేలోపు అసంతృప్త నేతలు, రెబల్ అభ్యర్థులను బుజ్జగించి పోటీ నుంచి తప్పించేలా సమన్వయ కమిటీలు చర్యలు చేపడుతున్నాయి. అధికారిక అభ్యర్థులకు మద్దతుగా నిలిచేలా ఇతర ఆశావహులను ఒప్పించేందుకు ప్రయత్నాలు కొనసాగుతున్నాయి. నామినేషన్ల ఉపసంహరణ ప్రక్రియ ముగిసిన తర్వాత వివిధ స్థానాల్లో కూటమి పార్టీల మధ్య పోటీ పరిస్థితిపై స్పష్టత వచ్చే అవకాశం ఉంది.