అమెరికాలో ఇజ్రాయెల్‌ వ్యతిరేక అధ్యక్షుడు రావొచ్చు.. నెతన్యాహు కీలక వ్యాఖ్యలు

భవిష్యత్తులో అమెరికా అధ్యక్షుడిగా ఇజ్రాయెల్‌ పట్ల వ్యతిరేక వైఖరి కలిగిన వ్యక్తి ఎన్నికయ్యే అవకాశం ఉందని ఇజ్రాయెల్‌ ప్రధాని బెంజమిన్‌ నెతన్యాహు వ్యాఖ్యానించారు. ఈ నేపథ్యంలో అమెరికాపై మాత్రమే ఆధారపడకుండా భారత్‌, లాటిన్‌ అమెరికా వంటి ప్రాంతీయ శక్తులతో సంబంధాలను బలోపేతం చేసుకోవాలని అధికారులకు సూచించారు. స్థానిక మీడియా కథనాల ప్రకారం, ఇజ్రాయెల్‌లో అక్టోబర్‌ 27న జరగనున్న ఎన్నికలకు ముందు ఆయన ఈ వ్యాఖ్యలు చేశారు. మరో రెండేళ్లలో అమెరికా అధ్యక్షుడిగా ఇజ్రాయెల్‌కు వ్యతిరేకంగా వ్యవహరించే వ్యక్తి బాధ్యతలు చేపట్టవచ్చని, ఆ వ్యక్తి పురుషుడైనా, మహిళ అయినా పరిస్థితులను ఎదుర్కొనేందుకు సిద్ధంగా ఉండాలని పేర్కొన్నారు. డొనాల్డ్‌ ట్రంప్‌ అధ్యక్షుడిగా ఉన్న సమయంలో అమెరికాతో సంబంధాలను మరింత బలోపేతం చేసుకోవడంతో పాటు, ఆ దేశం నుంచి సాధ్యమైనంత సహకారాన్ని పొందాలని నెతన్యాహు అభిప్రాయపడ్డారు.

భవిష్యత్తులో అమెరికా విధానాల్లో మార్పులు వచ్చినా ఇజ్రాయెల్‌ ప్రయోజనాలకు ఇబ్బంది కలగకుండా ఇతర దేశాలతోనూ వ్యూహాత్మక భాగస్వామ్యాలను పెంచుకోవాలని నెతన్యాహు అన్నారు. భారత్‌ ఒక బలమైన దేశమని పేర్కొంటూ, లాటిన్‌ అమెరికా, బ్రెజిల్‌ వంటి ప్రాంతాల్లోనూ కొత్త అవకాశాలు ఏర్పడవచ్చని చెప్పారు. అంతర్జాతీయ కూటముల సంఖ్యను పెంచుకోవడంతో పాటు, తమ దేశ ప్రాధాన్యాన్ని పెంచే సామర్థ్యాలను అభివృద్ధి చేసుకోవాలని అధికారులకు సూచించారు. అయితే, నెతన్యాహు వ్యాఖ్యలను ఎన్నికల్లో ఆయన ప్రధాన ప్రత్యర్థి గాడి ఐసెన్‌కోట్‌ విమర్శించారు. ఇతర దేశాల పేర్లను ప్రస్తావిస్తూ ప్రజల్లో భయాందోళనలు సృష్టించేందుకు నెతన్యాహు ప్రయత్నిస్తున్నారని ఆరోపించారు.