ఏపీలో స్థానిక ఎన్నికలకు బ్రేక్ పడుతుందా? బీసీ రిజర్వేషన్లపై హైకోర్టులో పిల్

ఆంధ్రప్రదేశ్‌లో స్థానిక సంస్థల ఎన్నికల నిర్వహణపై న్యాయపరమైన వివాదం తెరపైకి వచ్చింది. బీసీ రిజర్వేషన్ల అమలులో హైకోర్టు గతంలో జారీ చేసిన ఆదేశాలను ఉల్లంఘిస్తున్నారని ఆరోపిస్తూ పిటిషనర్ హైకోర్టులో ప్రజాప్రయోజన వ్యాజ్యం (పిల్) దాఖలు చేశారు. రిజర్వేషన్ల ప్రక్రియ కోర్టు సూచనలకు అనుగుణంగా లేదని పిటిషన్‌లో పేర్కొన్నట్లు సమాచారం.

పంచాయతీరాజ్, మున్సిపల్ శాఖలు రిజర్వేషన్లకు సంబంధించి జారీ చేసిన ప్రభుత్వ ఉత్తర్వులను పిటిషనర్ సవాల్ చేశారు. హైకోర్టు ఆదేశాల ప్రకారం రిజర్వేషన్లను అమలు చేసే వరకు స్థానిక సంస్థల ఎన్నికలను నిలిపివేయాలని విజ్ఞప్తి చేశారు. ఈ పిల్‌పై ఆంధ్రప్రదేశ్ హైకోర్టు నేడు విచారణ చేపట్టనుంది. విచారణలో కోర్టు ఇచ్చే ఆదేశాలపై ఎన్నికల ప్రక్రియకు సంబంధించి తదుపరి పరిణామాలు ఆధారపడి ఉండనున్నాయి.