ఏపీలో వాతావరణ శాఖ హెచ్చరిక

ఆంధ్రప్రదేశ్‌లోని నెల్లూరు, తిరుపతి జిల్లాలకు రాబోయే మూడు గంటల పాటు రెడ్ అలర్ట్ జారీ చేశారు. ఈ జిల్లాల్లో పలుచోట్ల పిడుగులతో కూడిన మోస్తరు వర్షాలు కురిసే అవకాశం ఉందని, ఒకటి రెండు ప్రాంతాల్లో భారీ వర్షాలు పడవచ్చని విపత్తుల నిర్వహణ సంస్థ హెచ్చరించింది. గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉన్నందున ప్రజలు అప్రమత్తంగా ఉండాలని సూచించింది.

ప్రకాశం, మార్కాపురం, కడప, కర్నూలు, నంద్యాల, అనంతపురం జిల్లాల్లోనూ అక్కడక్కడా వర్షాలు కురిసే అవకాశం ఉందని తెలిపింది. ఉరుములు, పిడుగులు, బలమైన గాలుల సమయంలో ప్రజలు చెట్ల కింద లేదా భారీ హోర్డింగ్‌ల సమీపంలో నిలబడవద్దని విపత్తుల నిర్వహణ సంస్థ ఎండీ ప్రఖర్ జైన్ సూచించారు. వాతావరణ పరిస్థితులను గమనిస్తూ అప్రమత్తంగా ఉండాలని అధికారులు ప్రజలకు విజ్ఞప్తి చేశారు.