స్థానిక ఎన్నికల్లో వైకాపాకు హైకోర్టులో మరో ఎదురుదెబ్బ

ఆంధ్రప్రదేశ్‌లో స్థానిక సంస్థల ఎన్నికల సందర్భంగా కేంద్ర బలగాలతో భద్రత కల్పించాలంటూ వైకాపా దాఖలు చేసిన పిటిషన్‌ను హైకోర్టు డివిజన్ బెంచ్ కొట్టివేసింది. పోలింగ్, ఓట్ల లెక్కింపు కేంద్రాల వద్ద కేంద్ర బలగాలను మోహరించేలా రాష్ట్ర ఎన్నికల సంఘాన్ని ఆదేశించాలని వైకాపా తన పిటిషన్‌లో కోరింది. అయితే, ఈ అభ్యర్థనను విచారించిన హైకోర్టు సింగిల్ జడ్జి బెంచ్ ఈ నెల 16న పిటిషన్‌ను తోసిపుచ్చింది. దీంతో వైకాపా ఆ తీర్పును సవాలు చేస్తూ డివిజన్ బెంచ్‌ను ఆశ్రయించింది.

తాజాగా ఈ పిటిషన్‌పై విచారణ చేపట్టిన హైకోర్టు డివిజన్ బెంచ్ కూడా వైకాపా అభ్యర్థనను తిరస్కరిస్తూ పిటిషన్‌ను కొట్టివేసింది. దీంతో స్థానిక సంస్థల ఎన్నికల్లో పోలింగ్, కౌంటింగ్ కేంద్రాల వద్ద కేంద్ర బలగాల భద్రత కల్పించాలన్న వైకాపా ప్రయత్నానికి చుక్కెదురైంది. ఈ పరిణామం రాష్ట్రంలో స్థానిక ఎన్నికల భద్రతా ఏర్పాట్లకు సంబంధించి రాజకీయంగా ప్రాధాన్యం సంతరించుకుంది.