సంగారెడ్డి కలెక్టరేట్, సదాశివపేటలో ఘనంగా బతుకమ్మ సంబరాలు..

సంగారెడ్డి కలెక్టరేట్‌లో వివిధ శాఖల ఉద్యోగులు, తెలంగాణ నాన్‌ గెజిటెడ్ అధికారుల సంఘం ఆధ్వర్యంలో బతుకమ్మ వేడుకలను ఘనంగా నిర్వహించారు. ఈ కార్యక్రమానికి నిర్మల జగ్గారెడ్డి హాజరయ్యారు. తెలంగాణ సంస్కృతి, సంప్రదాయాలకు బతుకమ్మ పండుగ ప్రతీకగా నిలుస్తుందని ఆమె పేర్కొన్నారు. రంగురంగుల పూలతో పేర్చిన బతుకమ్మలు, సంప్రదాయ ఆటపాటలతో కలెక్టరేట్ ప్రాంగణం పండుగ శోభను సంతరించుకుంది. మహిళా ఉద్యోగులు బతుకమ్మల చుట్టూ వలయంగా ఏర్పడి ఉత్సాహంగా ఆడిపాడారు. తెలంగాణ సాంస్కృతిక సారథి కళాకారులు ఆలపించిన బతుకమ్మ పాటలు వేడుకలకు మరింత ఉత్సాహాన్ని తీసుకొచ్చాయి. అదనపు కలెక్టర్ సంగీత, జిల్లా వైద్య ఆరోగ్య శాఖ అధికారి లలితా దేవి, కలెక్టరేట్ మహిళా ఉద్యోగులు పాల్గొన్నారు.

సదాశివపేట మున్సిపాలిటీ ఆధ్వర్యంలో నిర్వహించిన బతుకమ్మ వేడుకల్లోనూ నిర్మల జగ్గారెడ్డి ముఖ్య అతిథిగా పాల్గొని మహిళలతో కలిసి బతుకమ్మ ఆడారు. ప్రకృతిని పూజించే అరుదైన పూల పండుగ బతుకమ్మ అని, ఇది తెలంగాణ సంస్కృతి, సంప్రదాయాలకు ప్రత్యేక గుర్తింపుగా నిలుస్తుందని ఆమె అన్నారు. ఈ కార్యక్రమంలో సదాశివపేట మున్సిపల్ చైర్‌పర్సన్ మునిపల్లి అంజమ్మ సత్యనారాయణ, వైస్ చైర్‌పర్సన్ రేణుకా చిరు, కౌన్సిలర్లు, మున్సిపల్ ఉద్యోగులు పాల్గొన్నారు. ఈ వేడుకలు తెలంగాణ సాంస్కృతిక వారసత్వాన్ని కాపాడుతూ, సంప్రదాయాలను భావితరాలకు అందించాల్సిన ఆవశ్యకతను చాటిచెప్పాయి.