విపత్తు నిరోధక మౌలిక సదుపాయాల కూటమి (సీడీఆర్‌ఐ) విడుదల చేసిన నివేదిక ప్రకారం, తమిళనాడులో అత్యంత తీవ్రస్థాయి విపత్తు సంభవిస్తే సుమారు రూ.6,000 కోట్ల వరకు నష్టం వాటిల్లే ప్రమాదం ఉంది. విపత్తు అనంతరం మౌలిక సదుపాయాలను పునరుద్ధరించేందుకు అవసరమయ్యే ఖర్చు రాష్ట్ర ఆర్థిక సామర్థ్యాన్ని మించిపోయే అవకాశం ఉందని నివేదిక హెచ్చరించింది. 2004లో సంభవించిన సునామీ తరహా విపత్తు మళ్లీ వస్తే సుమారు రూ.1,665.73 కోట్ల నష్టం వాటిల్లవచ్చని, రాష్ట్రంపై అదనంగా రూ.291.62 కోట్ల రుణభారం పడే అవకాశం ఉందని అంచనా వేసింది. 2015 తరహా వరదలు సంభవించినా రాష్ట్ర ఖజానాపై భారం పడటంతో పాటు ప్రజల జీవనోపాధి, వ్యాపారాలపై దీర్ఘకాలిక ప్రభావం ఉంటుందని పేర్కొంది.

తమిళనాడులో విద్యుత్‌ వ్యవస్థతో పాటు ఇతర మౌలిక సదుపాయాలు తుపాన్లు, వరదల వంటి విపత్తులకు తగిన స్థాయిలో సిద్ధంగా లేవని సీడీఆర్‌ఐ నివేదికలో ప్రస్తావించినట్లు సమాచారం. 2015లో వచ్చిన వరదల వల్ల ఆరు జిల్లాల్లో సుమారు 40 లక్షల మంది ప్రభావితమవగా, 18 లక్షల మంది నిరాశ్రయులయ్యారు. 2004 సునామీ, 2011 థానె తుపాను, 2016 వార్దా తుపాను, 2017 ఓఖి తుపాను, 2018 గజ తుపాను వంటి ఘటనలు రాష్ట్రంపై తీవ్ర ప్రభావం చూపాయి. ఈ నేపథ్యంలో విపత్తుల ముప్పును ముందుగానే అంచనా వేసే డిజిటల్‌ డేటాబేస్‌ ఏర్పాటు చేయడంతో పాటు, ప్రమాద స్థాయిని బట్టి బడ్జెట్‌ కేటాయింపులు చేయాలని సీడీఆర్‌ఐ డైరెక్టర్‌ జనరల్‌ అమిత్‌ ప్రోతి సూచించారు. విపత్తులు సంభవించిన తర్వాత నష్టాన్ని పూడ్చడంపై కాకుండా, ముందస్తు సంసిద్ధత, సురక్షిత నిర్మాణాలపై దృష్టి పెట్టాలని పేర్కొన్నారు.