వచ్చే ఎన్నికలలోపు యమునా ప్రక్షాళన పూర్తి చేయడమే లక్ష్యం: పర్వేశ్ వర్మ

దిల్లీ ప్రజలు తమ పుట్టినరోజులు, ఇతర ప్రత్యేక సందర్భాలను యమునా నది ఒడ్డున జరుపుకోవాలని ఆ రాష్ట్ర జలవనరుల శాఖ మంత్రి పర్వేశ్ వర్మ వినూత్నంగా కోరారు. నదిని శుభ్రంగా ఉంచడంపై ప్రజల్లో అవగాహన పెంచడంతోపాటు, యమునాతో వ్యక్తిగత అనుబంధాన్ని పెంపొందించడమే ఈ ఆలోచన ప్రధాన ఉద్దేశమని తెలిపారు. నవంబర్ 7న తన పుట్టినరోజును యమునా నది తీరంలోనే జరుపుకోనున్నట్లు వెల్లడించారు. కుటుంబ సభ్యులు కలిసి వేడుకలు చేసుకునేందుకు నది ఒడ్డున ప్రత్యేక కుటీరాలను ఏర్పాటు చేయాలని ప్రభుత్వం యోచిస్తోందని చెప్పారు. నదీ తీరాలను శుభ్రంగా ఉంచేందుకు స్వచ్ఛందంగా పనిచేసేవారు కూడా ఈ సదుపాయాలను వినియోగించుకోవచ్చని పేర్కొన్నారు.

ఇటీవల నిర్వహించిన ‘చలో యమున’ కార్యక్రమంలో సుమారు 35 వేల మంది పాల్గొని, నదికి ఇరువైపులా ఉన్న 70 ప్రాంతాల్లో శుభ్రత కార్యక్రమాలు చేపట్టారు. ఈ నేపథ్యంలో మంత్రి తాజా ప్రతిపాదన ప్రాధాన్యం సంతరించుకుంది. ప్రజలకు యమునాతో వ్యక్తిగత అనుబంధం ఏర్పడితే, నదిని పరిశుభ్రంగా ఉంచే బాధ్యతను కూడా వారు స్వచ్ఛందంగా తీసుకుంటారని పర్వేశ్ వర్మ అభిప్రాయపడ్డారు. యమునా నది ప్రక్షాళన, అభివృద్ధి కోసం ప్రభుత్వం పలు చర్యలు చేపడుతోందని తెలిపారు. వచ్చే ఎన్నికలలోపు నదిని శుభ్రం చేయడమే లక్ష్యంగా పెట్టుకున్నట్లు వెల్లడించారు.