భూమి ఆరోగ్యానికి ముప్పుగా మారిన వాతావరణ మార్పులు

మన శరీర ఆరోగ్యాన్ని అంచనా వేయడానికి రక్తపోటు, గుండె కొట్టుకునే వేగం, శ్వాసక్రియ రేటు, శరీర ఉష్ణోగ్రత వంటి కీలక సంకేతాలను పరిశీలిస్తారు. ఇదే విధంగా భూమి ఆరోగ్యాన్ని అంచనా వేయడానికి ఉపయోగించే 16 కీలక వాతావరణ సూచికల్లో ఏడు చరిత్రలో ఎన్నడూ లేనంత గరిష్ఠ స్థాయులకు చేరినట్లు అమెరికాలోని ఒరెగాన్‌ స్టేట్‌ యూనివర్సిటీ పరిశోధకుల అధ్యయనం వెల్లడించింది. ఇంధన వినియోగానికి సంబంధించిన కర్బన ఉద్గారాలు తొలిసారిగా 41 గిగాటన్నులను దాటినట్లు నివేదిక పేర్కొంది. ‘2026 స్టేట్‌ ఆఫ్‌ ది క్లైమేట్‌ రిపోర్ట్‌’ పేరుతో రూపొందించిన ఈ అధ్యయనం ‘బయోసైన్స్‌’ జర్నల్‌లో ప్రచురితమైంది.

నివేదిక ప్రకారం, 2026 మే నాటికి వాతావరణంలో కార్బన్‌ డయాక్సైడ్‌ స్థాయులు పది లక్షల అణువులకు 428 అణువుల చొప్పున చేరాయి. మీథేన్‌ స్థాయులు 1,940 పీపీబీకి, నైట్రస్‌ ఆక్సైడ్‌ స్థాయులు 340 పీపీబీకి పెరిగాయి. భూతాపం కారణంగా సముద్ర మట్టాలు రికార్డు స్థాయికి చేరగా, సముద్ర ఉపరితల జలాలు కూడా తీవ్రంగా వేడెక్కాయి. ఈ పరిస్థితులు సూపర్‌ ఎల్‌నినో ఏర్పడటానికి దోహదం చేస్తున్నాయని నివేదిక పేర్కొంది. గ్రీన్‌లాండ్‌ మంచు పొర ద్రవ్యరాశి, ప్రపంచవ్యాప్తంగా హిమనీనదాల మందం రికార్డుల్లోనే అత్యల్ప స్థాయులకు పడిపోయినట్లు పరిశోధకులు గుర్తించారు.