నకిలీ ఎన్‌ఓసీల వ్యవహారంపై ఇంటర్‌ బోర్డును ప్రశ్నించిన కాలేజీల సంఘం

తెలంగాణలో ప్రైవేటు జూనియర్‌ కాలేజీలకు అనుబంధ గుర్తింపు ఇవ్వడంలో ఇంటర్‌ బోర్డు విఫలమైందని తెలంగాణ ప్రైవేటు జూనియర్‌ కాలేజీల యాజమాన్యాల సంఘం విమర్శించింది. ఫీజులు చెల్లించి నెలలు గడుస్తున్నప్పటికీ రాష్ట్రవ్యాప్తంగా 128 కాలేజీలకు ఇప్పటివరకు అనుబంధ గుర్తింపు ఇవ్వలేదని సంఘం అధ్యక్షుడు గౌరీ సతీష్‌ తెలిపారు. శనివారం సుందరయ్య విజ్ఞాన కేంద్రంలో జరిగిన సంఘం రాష్ట్ర కార్యవర్గ సమావేశం అనంతరం ఆయన మీడియాతో మాట్లాడారు. ఇంటర్‌ బోర్డు అధికారులు ప్రతి పనికీ లంచాలు అడుగుతున్నారని ఆయన ఆరోపించారు. అనుబంధ గుర్తింపు కోసం ఎదురుచూస్తున్న కాలేజీల్లో ఇప్పటికే ప్రవేశాలు పొందిన వేలాది మంది విద్యార్థుల భవిష్యత్తుపై ఆందోళన వ్యక్తం చేశారు.

వారం రోజుల్లో పెండింగ్‌లో ఉన్న కాలేజీలకు అనుబంధ గుర్తింపు ఇవ్వకపోతే రాష్ట్రవ్యాప్తంగా ప్రైవేటు జూనియర్‌ కాలేజీలన్నింటినీ మూసివేసి నిరసన చేపడతామని సంఘం హెచ్చరించింది. నకిలీ నో అబ్జెక్షన్‌ సర్టిఫికెట్ల (ఎన్‌ఓసీ) వ్యవహారంపై కూడా గౌరీ సతీష్‌ ప్రశ్నలు లేవనెత్తారు. పత్రాలు నకిలీవని తేలితే వాటిని పరిశీలించాల్సిన అధికారులు ఎలా ఆమోదించారని ప్రశ్నించారు. కాలేజీల్లో చిన్నచిన్న లోపాలను చూపించి డబ్బులు వసూలు చేసేందుకే టాస్క్‌ఫోర్స్‌ను ఏర్పాటు చేశారని ఆరోపించారు. ప్రతి సంవత్సరం కాలేజీలు ఇంటర్‌ బోర్డుకు సుమారు రూ.45 కోట్లు చెల్లిస్తున్నాయని పేర్కొంటూ, బోర్డు ఆర్థిక లావాదేవీలపై సమగ్ర విచారణ జరపాలని డిమాండ్‌ చేశారు. ఈ సమావేశంలో సంఘం సలహాదారు వరదారెడ్డి, ప్రధాన కార్యదర్శి విష్ణువర్ధన్‌ రెడ్డి, ఇతర కాలేజీల యాజమాన్యాల ప్రతినిధులు పాల్గొన్నారు.