సౌదీ అరేబియాలో దమ్మామ్ విమానాశ్రయంపై దాడి.. భారతీయుడు మృతి, ఇద్దరికి గాయాలు

సౌదీ అరేబియాలోని దమ్మామ్ విమానాశ్రయంపై బుధవారం సాయంత్రం జరిగిన దాడిలో ఒక భారతీయుడు, ఒక సౌదీ పౌరుడు ప్రాణాలు కోల్పోయినట్లు సౌదీ అరేబియా జనరల్ అథారిటీ ఆఫ్ సివిల్ ఏవియేషన్ (GACA) వెల్లడించింది. ఈ ఘటనలో మొత్తం ఎనిమిది మంది గాయపడినట్లు అధికారులు తెలిపారు. గాయపడిన వారిలో ఇద్దరు భారతీయులు, ఇద్దరు యెమెన్ పౌరులు, ఇద్దరు బంగ్లాదేశ్ పౌరులు, ఒక నేపాల్ పౌరుడు ఉన్నట్లు సమాచారం. మరో గాయపడిన వ్యక్తి జాతీయతకు సంబంధించిన వివరాలు అందుబాటులో లేవు.

ఈ ఘటనపై భారత అధికారులు స్పందిస్తూ, బాధిత భారతీయుల కుటుంబాలను సంప్రదిస్తున్నట్లు తెలిపారు. మృతుడి కుటుంబ సభ్యులకు, ఆత్మీయులకు ప్రగాఢ సానుభూతి తెలియజేయడంతో పాటు, గాయపడిన వారు త్వరగా కోలుకోవాలని ఆకాంక్షించారు. సౌదీ అధికారులతో సమన్వయం చేసుకుంటూ భారత రాయబార కార్యాలయ అధికారులు ఘటనకు సంబంధించిన మరిన్ని వివరాలను సేకరిస్తున్నారు. యెమెన్‌కు చెందిన హౌతీ తిరుగుబాటుదారులు సౌదీ అరేబియాపై దాడులను తీవ్రతరం చేస్తున్నారన్న వార్తల నేపథ్యంలో ఈ ఘటన చోటుచేసుకుంది. దాడికి సంబంధించిన పూర్తి వివరాలు, బాధ్యులపై మరింత అధికారిక సమాచారం వెలువడాల్సి ఉంది.