తిరుమలలో కొనసాగుతున్న భక్తుల రద్దీ

తిరుమల శ్రీవేంకటేశ్వరస్వామి దర్శనానికి భక్తులు సుమారు 12 గంటల పాటు వేచి ఉండాల్సి వస్తోంది. శుక్రవారం సాయంత్రం 5 గంటల వరకు ఉన్న సమాచారం ప్రకారం, వైకుంఠం క్యూ కాంప్లెక్స్‌-2లోని 28 కంపార్ట్‌మెంట్లు, నారాయణగిరిలోని తొమ్మిది షెడ్లు సర్వదర్శనం కోసం వేచి ఉన్న భక్తులతో నిండిపోయాయి. దీంతో క్యూలైన్‌ శిలాతోరణం సర్కిల్‌ వరకు విస్తరించింది.

మరోవైపు, వైకుంఠం క్యూ కాంప్లెక్స్‌-1లోని ఐదు కంపార్ట్‌మెంట్లలో టైమ్‌స్లాట్‌ టోకెన్లు కలిగిన భక్తులు వేచి ఉన్నారు. బుధవారం శ్రీవారి హుండీ ఆదాయం రూ.3.87 కోట్లుగా నమోదైంది. గురువారం 72,337 మంది భక్తులు స్వామివారిని దర్శించుకోగా, 33,548 మంది తలనీలాలు సమర్పించారు.