శ్రీవారి బ్రహ్మోత్సవాల పుష్పాలంకరణలకు భక్తుల ప్రశంసలు

తిరుమల శ్రీవారి సాలకట్ల, నవరాత్రి బ్రహ్మోత్సవాల సందర్భంగా చేపట్టిన పుష్పాలంకరణలకు భక్తుల నుంచి విశేష ప్రశంసలు లభించాయని టీటీడీ గార్డెన్ డిప్యూటీ డైరెక్టర్ శ్రీనివాసులు తెలిపారు. ఆదివారం తిరుమలలోని రామ్ బగీచా-2 మీడియా సెంటర్‌లో నిర్వహించిన సమావేశంలో ఆయన మాట్లాడారు. బ్రహ్మోత్సవాల అలంకరణల కోసం సుమారు 30 మంది దాతలు సహకరించారని, వారి తోడ్పాటు, ఉన్నతాధికారుల ప్రోత్సాహం, ఉద్యానవన సిబ్బంది కృషితో పుష్పాలంకరణలను వైభవంగా నిర్వహించామని చెప్పారు. ఈ అలంకరణల కోసం సుమారు 60 టన్నుల పుష్పాలు, 5 లక్షల కట్ ఫ్లవర్స్, 80 వేల సీజనల్ పూలను వినియోగించినట్లు వెల్లడించారు.

శ్రీవారి ఆలయం వద్ద బ్రహ్మోత్సవాల తొలిరోజు, గరుడసేవ రోజు, ఏడో రోజు పుష్పాలంకరణలను మార్చినట్లు శ్రీనివాసులు తెలిపారు. జీఎన్‌సీ వద్ద ఏర్పాటు చేసిన పుష్పాలంకరణ భక్తులను విశేషంగా ఆకట్టుకుందని చెప్పారు. కల్యాణ వేదిక వద్ద నిర్వహించిన ఫల, పుష్ప ప్రదర్శనలో చిన్నారులకు పురాణాలపై ఆసక్తి కలిగించేలా 24 విభిన్న ఇతివృత్తాలతో అలంకరణలు ఏర్పాటు చేసినట్లు వివరించారు. తిరుమలలోని 34 ఉద్యానవనాల అభివృద్ధికి భవిష్యత్తులో కృత్రిమ మేధ (ఏఐ) సాంకేతికతను వినియోగించేందుకు ప్రణాళికలు రూపొందిస్తున్నామని తెలిపారు. వీటిలో 20 ఉద్యానవనాలను దాతలు, 14 ఉద్యానవనాలను టీటీడీ నిర్వహిస్తున్నట్లు పేర్కొన్నారు.