కన్నడిగులకు ఉద్యోగాల్లో అన్యాయం చేస్తే సహించేది లేదు- డీకే శివకుమార్‌

బెంగళూరులోని ఐటీ కంపెనీలు కన్నడిగులకు ఉద్యోగావకాశాలు కల్పించడంలో వివక్ష చూపుతున్నాయంటూ ఫిర్యాదులు రావడం ఆందోళనకరమని కర్ణాటక ఉప ముఖ్యమంత్రి డీకే శివకుమార్‌ అన్నారు. కన్నడ మాతృభాషకు తగిన గుర్తింపు ఇవ్వకపోవడం వంటి అంశాలను ప్రభుత్వం తీవ్రంగా పరిగణిస్తుందని స్పష్టం చేశారు. కర్ణాటకలో కన్నడ భాషా గౌరవానికి, స్థానికుల హక్కులకు భంగం కలిగించే చర్యలను సహించబోమని హెచ్చరించారు. ఇటీవల కన్నడిగులకు ఉద్యోగావకాశాలు కల్పించే అంశంపై సామాజిక మాధ్యమాల్లో పలు వీడియోలు వైరల్‌ అయ్యాయి. రెజ్యూమెలో భాషల వివరాల విభాగంలో కన్నడ అని పేర్కొన్నందుకు తన ఉద్యోగ దరఖాస్తును తిరస్కరించారని ఆరోపిస్తూ ఓ మహిళ చేసిన పోస్ట్‌ చర్చనీయాంశమైంది. ఈ వ్యవహారంపై డీకే శివకుమార్‌ ఆదివారం ‘ఎక్స్‌’ వేదికగా స్పందించారు.

ప్రపంచవ్యాప్తంగా బెంగళూరును భారతదేశ సాంకేతిక రాజధానిగా గుర్తిస్తున్నారని డీకే శివకుమార్‌ పేర్కొన్నారు. కన్నడిగుల ప్రతిభ, నైపుణ్యం, సామర్థ్యంపై ప్రభుత్వానికి అపారమైన నమ్మకం ఉందన్నారు. ప్రైవేట్‌ కంపెనీలు ఉద్దేశపూర్వకంగా స్థానికులను నిర్లక్ష్యం చేస్తున్నట్లు తేలితే కఠిన చర్యలు తీసుకుంటామని హెచ్చరించారు. కన్నడిగుల హక్కులు, గౌరవం, ఉద్యోగావకాశాల పరిరక్షణకు ప్రభుత్వం కట్టుబడి ఉందని తెలిపారు. స్థానికుల సమస్యలపై ప్రభుత్వం నిరంతరం స్పందిస్తుందని స్పష్టం చేశారు. బెంగళూరులోని ఐటీ రంగంలో స్థానికులకు సముచిత అవకాశాలు కల్పించాలన్న డిమాండ్‌ నేపథ్యంలో ఈ వ్యాఖ్యలు ప్రాధాన్యం సంతరించుకున్నాయి.