గరుత్మంతుడిపై శ్రీవారి దివ్య దర్శనం...భక్తులకు కనుల పండుగ

కలియుగ వైకుంఠం తిరుమల శుక్రవారం రాత్రి గోవింద నామస్మరణతో మారుమోగింది. నవరాత్రి బ్రహ్మోత్సవాల్లో భాగంగా ఐదో రోజు గరుడోత్సవం వైభవంగా జరిగింది. చిరుజల్లుల మధ్య కర్పూర హారతులు, మంగళవాయిద్యాలు, వేదమంత్రాలు, కళాకారుల ప్రదర్శనల నడుమ శ్రీవేంకటేశ్వరస్వామి తన ఇష్ట వాహనమైన గరుత్మంతుడిపై కొలువుదీరి భక్తులకు దర్శనమిచ్చారు. రాత్రి 6.28 గంటలకు వాహన మండపం తెరుచుకోగానే మాడవీధులు గోవింద నామస్మరణతో మారుమోగాయి.

అంతకుముందు ఉదయం మోహినీ అవతార సేవ కన్నులపండువగా జరిగింది. తిరుచ్చిపై శ్రీకృష్ణస్వామి తోడుగా రాగా, మలయప్పస్వామి మోహినీ అవతారంలో సర్వాలంకార భూషితుడై భక్తులకు దర్శనమిచ్చారు. స్వామివారి విశేష అలంకరణ భక్తులను ఆకట్టుకుంది. గరుడోత్సవం, మోహినీ అవతార సేవలతో తిరుమలలో ఆధ్యాత్మిక సందడి నెలకొంది.