వ్యాపారవేత్త మెటా గ్లాసెస్‌పై అనుమానం.. డీకే శివకుమార్ కీలక వ్యాఖ్యలు

కర్ణాటక మంత్రులను లక్ష్యంగా చేసుకుని స్టింగ్ ఆపరేషన్లు జరుగుతున్నాయని గతంలో ఆరోపించిన ఉపముఖ్యమంత్రి డీకే శివకుమార్ తాజాగా మరో సంచలన విషయం వెల్లడించారు. కేరళ సీఎం వీడీ సతీశన్‌తో పాటు తనపైనా స్టింగ్ ఆపరేషన్‌కు ప్రయత్నం జరిగిందని ఆరోపించారు. ఇందుకోసం మెటా స్మార్ట్ గ్లాసెస్‌ను ఉపయోగించినట్లు తెలిపారు. ఓ స్థానిక మీడియా సంస్థకు ఇచ్చిన ఇంటర్వ్యూలో ఆయన ఈ వ్యాఖ్యలు చేశారు. తనను కలిసేందుకు వచ్చిన ఓ వ్యాపారవేత్త మెటా స్మార్ట్ గ్లాసెస్ ధరించి ఉండటంతో అనుమానం కలిగిందని డీకే శివకుమార్ పేర్కొన్నారు. వ్యాపార సంబంధిత చర్చల పేరుతో రహస్యంగా వీడియో రికార్డు చేసేందుకు ప్రయత్నించినట్లు ఆరోపించారు.

ఆ వ్యాపారవేత్త కదలికలు, ఇతర రాజకీయ నాయకులతో ఆయన జరిపిన సమావేశాల గురించి సమాచారం సేకరించేందుకు ప్రయత్నించానని డీకే శివకుమార్ తెలిపారు. ఎన్డీయే నాయకులను కలిసినప్పుడు మాత్రం ఆ వ్యక్తి మెటా గ్లాసెస్ ధరించలేదని ఆరోపించారు. తనతో పాటు ఇతర కాంగ్రెస్ నేతలను లక్ష్యంగా చేసుకుని పెద్ద ఎత్తున స్టింగ్ ఆపరేషన్ నిర్వహించేందుకు జరుగుతున్న ప్రయత్నాల్లో ఇది భాగమై ఉండవచ్చని అనుమానం వ్యక్తం చేశారు. మంత్రులంతా అప్రమత్తంగా ఉండాలని సూచించారు. ఈ ఆరోపణలు కర్ణాటక రాజకీయాల్లో చర్చకు దారితీశాయి. గతంలోనూ డీకే శివకుమార్ చేసిన స్టింగ్ ఆపరేషన్ వ్యాఖ్యలపై కేంద్ర మంత్రి హెచ్‌డీ కుమారస్వామి విమర్శలు చేశారు. మంత్రులను తన ఆధీనంలో ఉంచుకునేందుకే డీకే ఇలాంటి వ్యాఖ్యలు చేస్తున్నారని, సిద్ధరామయ్య ప్రభుత్వంలోని మంత్రులపై స్టింగ్ ఆపరేషన్ నిర్వహించి సీఎం పదవిని దక్కించుకోవాలని చూశారని ఆయన ఆరోపించారు.