ఉద్యోగం వదిలి వ్యాపారంలో సక్సెస్.. మాజీ బాస్ పంపిన ఈమెయిల్‌ నెట్టింట వైరల్!

ఉద్యోగాన్ని వదిలి సొంతంగా ఎదగాలనుకున్న ఓ యువకుడికి అతని మాజీ బాస్ పంపిన ఈమెయిల్ ఇప్పుడు సోషల్ మీడియాలో అందరి దృష్టిని ఆకర్షిస్తోంది. జైపూర్‌కు చెందిన ఓ బ్రాండ్ మార్కెటర్ రెండేళ్ల క్రితం కార్పొరేట్ ఉద్యోగానికి రాజీనామా చేసి సొంత వ్యాపారాన్ని ప్రారంభించాడు. అప్పట్లో అతని నిర్ణయం పొరపాటు కావచ్చని భావించిన బాస్, వ్యాపారం సరిగా సాగకపోతే తిరిగి ఉద్యోగంలో చేరవచ్చని చెప్పినట్లు సమాచారం. అయితే, ఆ యువకుడు తన ప్రయత్నాలను కొనసాగిస్తూ వ్యాపారంలో ముందుకు సాగాడు. ఇటీవల లింక్డ్‌ఇన్‌లో అతను పంచుకున్న విజయగాథను చూసిన మాజీ బాస్ స్పందించారు.

తిరిగి ఉద్యోగంలో చేరే అవకాశాలకు తలుపులు అధికారికంగా మూసుకుపోయాయని మాజీ బాస్ ఈమెయిల్‌లో పేర్కొన్నారు. అయితే, కంపెనీ అతన్ని తిరిగి ఆహ్వానించదనే ఉద్దేశంతో ఈ మాటలు చెప్పలేదని, అతను మళ్లీ ఉద్యోగానికి తిరిగి రావాల్సిన పరిస్థితి ఎప్పుడూ రాకూడదనే ఆశతో అలా రాశానని వివరించారు. ఆ ఈమెయిల్‌ను యువకుడు రెడిట్‌లో పంచుకోవడంతో ఈ కథ వైరల్‌గా మారింది. మాజీ బాస్ చూపిన ఆప్యాయత, ఉద్యోగి ఎదుగుదల పట్ల ఆయన వ్యక్తం చేసిన నిజమైన సంతోషాన్ని నెటిజన్లు ప్రశంసిస్తున్నారు. ఉద్యోగ సంబంధాలు కేవలం పని వరకే పరిమితం కాకుండా, పరస్పర గౌరవం, ప్రోత్సాహంతోనూ కొనసాగవచ్చని ఈ ఘటన గుర్తుచేస్తోంది.