పండుగ వేళ ప్రయాణ కష్టాలు..బస్టాండ్ల నుంచి హైవేల వరకు రద్దీ

బతుకమ్మ, దసరా పండుగల నేపథ్యంలో హైదరాబాద్‌ నుంచి ప్రజలు సొంతూళ్లకు బయలుదేరడంతో నగరంలో ప్రయాణికుల రద్దీ పెరిగింది. శుక్రవారం సాయంత్రం నుంచే ఎంజీబీఎస్‌, జూబ్లీ బస్టాండ్లు ప్రయాణికులతో కిక్కిరిసిపోయాయి. రద్దీకి తగ్గట్టుగా బస్సులు అందుబాటులో లేకపోవడంతో సీట్ల కోసం ప్రయాణికులు ఇబ్బందులు పడుతున్నారు. బస్సుల కోసం గంట నుంచి గంటన్నర వరకు వేచి చూడాల్సి వస్తోందని పలువురు ఆవేదన వ్యక్తం చేస్తున్నారు. ఏర్పాట్లు చేశామని ఆర్టీసీ అధికారులు చెబుతున్నప్పటికీ, పండుగ రద్దీ పేరుతో టికెట్‌ ధరలు 50 శాతం పెంచడంపై ప్రయాణికులు అసంతృప్తి వ్యక్తం చేస్తున్నారు. సాధారణంగా రూ.300 ఉండే టికెట్‌ ధర రూ.450 వరకు పెరిగిందని చెబుతున్నారు. మరోవైపు, కూకట్‌పల్లి, సంజీవరెడ్డినగర్‌, అమీర్‌పేట ప్రాంతాల నుంచి ఆంధ్రప్రదేశ్‌లోని పలు జిల్లాలకు వెళ్లే ప్రైవేట్‌ ట్రావెల్స్‌ నిర్వాహకులు రద్దీని బట్టి సాధారణ ధరలకు రెండింతలు వసూలు చేస్తున్నారని ప్రయాణికులు ఆరోపిస్తున్నారు.

శుక్రవారం జూబ్లీ బస్టాండులో ప్రయాణికుల రద్దీ, ఏర్పాట్లను టీజీఎస్‌ఆర్టీసీ ఎండీ వై. నాగిరెడ్డి పరిశీలించారు. బస్టాండ్‌లో తాగునీరు, పారిశుధ్యం, విశ్రాంతి వసతులను తనిఖీ చేసి, ప్రయాణికులతో మాట్లాడి వివరాలు తెలుసుకున్నారు. ఈ నెల 17, 18 తేదీల్లో రద్దీ మరింత పెరిగే అవకాశం ఉండటంతో అవసరమైన ప్రాంతాల్లో అదనపు బస్సులు నడపాలని అధికారులను ఆదేశించారు. ప్రయాణికులు ముందస్తు రిజర్వేషన్ల కోసం www.tgsrtcbus.in వెబ్‌సైట్‌ను ఉపయోగించుకోవాలని, సమాచారం కోసం 040-69440000, 040-23450033 హెల్ప్‌లైన్‌ నంబర్లను సంప్రదించాలని అధికారులు సూచించారు.

మరోవైపు, సొంత వాహనాలు, ప్రైవేట్‌ బస్సుల్లో ప్రజలు పెద్దఎత్తున ప్రయాణించడంతో హైదరాబాద్‌–విజయవాడ జాతీయ రహదారి 65పై వాహనాల రద్దీ పెరిగింది. యాదాద్రి భువనగిరి జిల్లా చౌటుప్పల్‌లో ఫ్లైఓవర్‌ నిర్మాణ పనుల కారణంగా వాహనాలను సర్వీస్‌ రోడ్లపైకి మళ్లించారు. ఈ రహదారులు ఇరుకుగా ఉండటంతో వాహనాలు నెమ్మదిగా కదిలి, కిలోమీటర్ల మేర నిలిచిపోయాయి. నల్లగొండ జిల్లా కేతేపల్లి మండలంలోని కొర్లపహాడ్‌ టోల్‌ప్లాజా వద్ద కూడా రద్దీ ఏర్పడింది. ఫాస్టాగ్‌ స్కానర్లలో సాంకేతిక సమస్యల కారణంగా పలుమార్లు ట్రాఫిక్‌కు అంతరాయం కలిగి ప్రయాణికులు ఇబ్బందులు ఎదుర్కొన్నారు.