పుష్కరాల బడ్జెట్‌పై ఎఫ్‌జీజీ అభ్యంతరం

రాబోయే గోదావరి పుష్కరాల నిర్వహణ కోసం ప్రభుత్వం రూ.1,000 కోట్ల వ్యయాన్ని ప్రతిపాదిస్తున్నట్లు తెలిసిందని ఫోరం ఫర్ గుడ్ గవర్నెన్స్ (ఎఫ్‌జీజీ) తెలిపింది. రాష్ట్ర ఆర్థిక పరిస్థితిని దృష్టిలో ఉంచుకుని ఇంత భారీ మొత్తంలో ఖర్చు చేసే ప్రతిపాదనను పునఃపరిశీలించాలని కోరింది. ఈ మేరకు ఎఫ్‌జీజీ అధ్యక్షుడు పద్మనాభరెడ్డి గురువారం ముఖ్యమంత్రి రేవంత్‌ రెడ్డికి లేఖ రాశారు.

పుష్కరాల సమయంలో అన్ని ప్రాంతాల్లో భక్తుల రద్దీ ఒకే విధంగా ఉండదని పద్మనాభరెడ్డి పేర్కొన్నారు. అందువల్ల భారీ వ్యయంతో కూడిన పనులకు బదులుగా తాగునీరు, వైద్య సదుపాయాలు, మరుగుదొడ్లు వంటి అత్యవసర వసతుల కల్పనకే ప్రాధాన్యం ఇవ్వాలని విజ్ఞప్తి చేశారు. ప్రజాధనాన్ని అవసరమైన పనులకే వినియోగించేలా చర్యలు తీసుకోవాలని కోరారు.