నాంపల్లి FSL అగ్నిప్రమాదంపై FIR నమోదు

హైదరాబాద్‌ నాంపల్లిలోని ఫోరెన్సిక్‌ సైన్స్‌ ల్యాబ్‌ (FSL) అగ్నిప్రమాద ఘటనపై పోలీసులు FIR నమోదు చేశారు. FSL ఇన్‌స్పెక్టర్‌ శ్రీనివాస్‌ రెడ్డి ఫిర్యాదు మేరకు కేసు నమోదు కాగా, ఉదయం 10:08 గంటల సమయంలో ల్యాబ్‌లోని ప్రాపర్టీ రూమ్‌లో మంటలు చెలరేగినట్లు వెల్లడైంది. మంటలను గమనించిన ఉద్యోగి సాయికృష్ణ వెంటనే అధికారులకు సమాచారం ఇవ్వగా, ఉదయం 10:30 గంటలకు ఘటనాస్థలికి చేరుకున్న అగ్నిమాపక సిబ్బంది సహాయక చర్యలు చేపట్టి సుమారు మూడు గంటల శ్రమ తర్వాత మధ్యాహ్నం 1:30 గంటలకు మంటలను పూర్తిగా అదుపులోకి తీసుకువచ్చారు. ప్రమాదానికి గల కారణాలపై పోలీసులు దర్యాప్తు కొనసాగిస్తున్నారు.

ఇదిలా ఉండగా, సైన్స్ ల్యాబ్‌లో జరిగిన అగ్నిప్రమాదంపై పూర్తి స్థాయిలో విచారణ కొనసాగుతోందని FSL డైరెక్టర్ శిఖా గోయల్ తెలిపారు. ఈ ఘటనపై కొందరు అసత్య ప్రచారాలు చేస్తున్నారని, అగ్నిప్రమాద సమయంలో అక్కడ ఎవరు ఉన్నారనే అంశంపై సమగ్రంగా ఆరా తీస్తున్నామని చెప్పారు. సోషల్ మీడియాలో జరుగుతున్న వదంతులను నమ్మవద్దని ఆమె ప్రజలకు సూచించారు.