పరవాడ ఫార్మాసిటీలో అగ్నిప్రమాదం.. అరబిందో ఫార్మా యూనిట్‌-15లో మంటలు

అనకాపల్లి జిల్లాలోని పరవాడ జవహర్‌లాల్‌ నెహ్రూ ఫార్మాసిటీలో అగ్నిప్రమాదం చోటుచేసుకుంది. అక్కడ ఉన్న అరబిందో ఫార్మా పరిశ్రమ యూనిట్‌-15లోని ప్రొడక్షన్‌ బ్లాక్‌లో తెల్లవారుజామున 5.30 గంటల సమయంలో అకస్మాత్తుగా మంటలు చెలరేగాయి. ఐసోప్రొపైల్‌ బ్యాచ్‌ను ప్రారంభించి, శుభ్రపరిచే సమయంలో ఈ ప్రమాదం జరిగినట్లు ప్రాథమిక సమాచారం. మంటల కారణంగా ప్రొడక్షన్‌ బ్లాక్‌ అంతటా పొగలు వ్యాపించాయి. దీంతో అక్కడ విధుల్లో ఉన్న ఉద్యోగులు అప్రమత్తమై బయటకు పరుగులు తీశారు. సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకుని మంటలను అదుపులోకి తీసుకొచ్చారు. ఈ ఘటనలో ఎలాంటి ప్రాణనష్టం లేదా గాయాలు నమోదు కాకపోవడంతో అధికారులు, పరిశ్రమ యాజమాన్యం ఊపిరి పీల్చుకున్నారు.

ప్రమాదానికి కారణాలపై అధికారుల ఆరా

ఈ అగ్నిప్రమాదానికి విద్యుత్‌ షార్ట్‌ సర్క్యూట్‌ లేదా రసాయన చర్య కారణమై ఉండొచ్చని అధికారులు ప్రాథమికంగా అంచనా వేస్తున్నారు. అయితే ప్రమాదానికి అసలు కారణం ఏమిటన్నది ఇంకా నిర్ధారణ కాలేదు. ప్రొడక్షన్‌ బ్లాక్‌లో పొగలు వేగంగా వ్యాపించడంతో ఉద్యోగుల్లో ఆందోళన నెలకొంది. అగ్నిమాపక సిబ్బంది సకాలంలో స్పందించి మంటలను అదుపులోకి తీసుకురావడంతో పరిస్థితి అదుపులోకి వచ్చింది. ప్రమాదానికి దారితీసిన పరిస్థితులు, పరిశ్రమలోని పరికరాలు లేదా ఉత్పత్తి విభాగానికి ఏమైనా నష్టం వాటిల్లిందా అనే అంశాలపై తదుపరి పరిశీలనతో స్పష్టత వచ్చే అవకాశం ఉంది.