బంగాళాఖాతంలో మరో అల్పపీడనం.. ఏపీలో రేపటి నుంచి వర్షాలు

బంగాళాఖాతంలో మరో అల్పపీడనం ఏర్పడే అవకాశం ఉండటంతో ఆంధ్రప్రదేశ్‌కు వాయుగుండం ముప్పు పొంచి ఉంది. ఈ అల్పపీడనం క్రమంగా బలపడి వాయుగుండంగా మారవచ్చని, అనంతరం తుఫాన్‌గా బలపడే అవకాశముందని భారత వాతావరణ శాఖ (IMD) అంచనా వేస్తోంది. వాతావరణ వ్యవస్థ కదలికలను అధికారులు నిశితంగా పరిశీలిస్తున్నారు. ఈ నెల 28 నాటికి కాకినాడ సమీపంలో తీరాన్ని దాటే అవకాశం ఉందని ప్రాథమిక అంచనాలు సూచిస్తున్నాయి.

ఈ వాతావరణ మార్పుల ప్రభావంతో ఆంధ్రప్రదేశ్‌లో రేపటి నుంచి వర్షాలు కురిసే అవకాశం ఉంది. అల్పపీడనం బలపడే కొద్దీ వర్షాల తీవ్రత, తుఫాన్‌ దిశ, తీరం దాటే సమయం వంటి అంశాలపై స్పష్టత వచ్చే అవకాశం ఉంది. ప్రజలు వాతావరణ శాఖ జారీ చేసే తాజా హెచ్చరికలను గమనించాలని, అధికారుల సూచనలను పాటించాలని సూచిస్తున్నారు.