గిన్నిస్‌ రికార్డు సాధించిన మూడేళ్ల బాలుడు

చదవడం నేర్చుకునే వయసులోనే ఓ పుస్తకాన్ని రచించి ప్రపంచ రికార్డు సాధించాడు భారత సంతతికి చెందిన చిన్నారి అద్వయ్‌ జైన్‌. అమెరికాలోని న్యూజెర్సీకి చెందిన ఈ బాలుడు కేవలం 3 సంవత్సరాల 345 రోజుల వయసులోనే పుస్తకాన్ని ప్రచురించి గిన్నిస్‌ వరల్డ్‌ రికార్డ్స్‌లో స్థానం సంపాదించాడు. ‘డైనో లెర్న్స్‌ నాట్‌ టు వేస్ట్‌ ఫుడ్‌’ పేరుతో ఆయన రచించిన పిల్లల పుస్తకానికి ప్రీస్కూల్‌లో భోజనం చేసే సమయంలో గమనించిన ఓ సాధారణ విషయమే ప్రేరణగా నిలిచింది. ఆహారాన్ని వృథా చేయకూడదనే సందేశాన్ని చిన్నారులకు అర్థమయ్యేలా ఈ పుస్తకంలో వివరించారు. రోజువారీ జీవితంలో గమనించిన చిన్న విషయాన్ని సృజనాత్మకంగా కథగా మలచడం ద్వారా అద్వయ్‌ అరుదైన ఘనత సాధించాడు. అతి పిన్న వయసులో పుస్తకాన్ని ప్రచురించిన పురుషుడిగా గిన్నిస్‌ వరల్డ్‌ రికార్డ్స్‌ అధికారికంగా గుర్తించింది.

ప్రస్తుతం నాలుగేళ్ల వయసులో ఉన్న అద్వయ్‌ జైన్‌ సాధించిన ఈ విజయానికి న్యూయార్క్‌లోని భారత కాన్సులేట్‌ జనరల్‌ కూడా గుర్తింపు ఇచ్చింది. చిన్నారుల్లో ఉండే ఆసక్తి, పరిశీలనాశక్తి, సృజనాత్మకతకు ఈ ఘనత నిదర్శనంగా నిలుస్తోంది. భోజన సమయంలో ఆహారం వృథా కావడాన్ని గమనించిన ఓ చిన్నారి.. అదే అంశాన్ని పుస్తకంగా రూపొందించి అంతర్జాతీయ గుర్తింపు పొందడం విశేషం. ఆహార సంరక్షణ వంటి ముఖ్యమైన అంశాన్ని చిన్నారులకు సులభంగా అర్థమయ్యేలా చెప్పడంలో ఈ పుస్తకం ప్రత్యేకతను చాటుకుంది. వయసుతో సంబంధం లేకుండా సృజనాత్మక ఆలోచనలకు ప్రోత్సాహం లభిస్తే అద్భుత విజయాలు సాధించవచ్చని అద్వయ్‌ కథ నిరూపిస్తోంది.