జర్మనీలో అగ్నిప్రమాదం.. ముగ్గురు భారతీయులు మృతి, రొమేనియా వ్యక్తి అరెస్ట్

జర్మనీలోని బోఖుమ్ నగరంలో ఓ నివాస భవనంలో జరిగిన ఘోర అగ్నిప్రమాదం విషాదాన్ని నింపింది. ఈ ఘటనలో ముగ్గురు భారతీయులు ప్రాణాలు కోల్పోగా, మరో ఐదుగురు గాయపడ్డారు. స్థానిక మీడియా కథనాల ప్రకారం, మృతుల్లో 25, 27 ఏళ్ల వయసున్న ఇద్దరు మహిళలు, 26 ఏళ్ల యువకుడు ఉన్నారు. మంటలను అదుపు చేసేందుకు వచ్చిన అగ్నిమాపక సిబ్బంది భవనం రెండో అంతస్తులోని ఓ అపార్ట్‌మెంట్‌లో మృతదేహాలను గుర్తించారు. పొగ పీల్చడంతో అస్వస్థతకు గురైన మరో ఐదుగురిని చికిత్స కోసం బోఖుమ్‌లోని ఆసుపత్రులకు తరలించారు. గాయపడిన వారి జాతీయత వివరాలు వెల్లడించలేదు.

ఈ ఘటనకు సంబంధించి అదే భవనంలో నివసిస్తున్న 41 ఏళ్ల రొమేనియా దేశస్థుడిని పోలీసులు హత్య అనుమానంతో అరెస్ట్ చేసినట్లు నివేదికలు పేర్కొన్నాయి. అగ్నిప్రమాదం ప్రమాదవశాత్తు జరిగిందా, ఎవరైనా ఉద్దేశపూర్వకంగా నిప్పంటించారా అనే కోణాల్లో అధికారులు దర్యాప్తు చేస్తున్నారు. ప్రాథమిక పరిశీలనలో సాంకేతిక లోపం కారణంగా మంటలు చెలరేగినట్లు కనిపించడం లేదని సమాచారం. దీంతో అగ్నిప్రమాదానికి గల అసలు కారణాన్ని గుర్తించేందుకు పోలీసులు ఆధారాలను పరిశీలిస్తున్నారు. అరెస్టయిన వ్యక్తి పాత్రపై కూడా దర్యాప్తు కొనసాగుతోంది. ఇప్పటివరకు అగ్నిప్రమాదానికి కారణం అధికారికంగా నిర్ధారణ కాలేదు.