భారీ వర్షం ఎఫెక్ట్...చెన్నైకి మళ్లిన తిరుపతి విమానం

తిరుపతి విమానాశ్రయంలో శుక్రవారం భారీ వర్షం, ఈదురుగాలుల కారణంగా విమానాల రాకపోకలకు అంతరాయం ఏర్పడింది. విజయవాడ నుంచి మధ్యాహ్నం 2:45 గంటలకు బయలుదేరిన ఇండిగో విమానం 3:20 గంటలకు తిరుపతికి చేరుకోవాల్సి ఉండగా, ప్రతికూల వాతావరణం కారణంగా అక్కడ దిగలేకపోయింది. సుమారు గంటపాటు గాల్లో చక్కర్లు కొట్టిన విమానం సాయంత్రం 4:30 గంటలకు చెన్నై విమానాశ్రయంలో దిగింది. హైదరాబాద్‌, విశాఖపట్నం నుంచి తిరుపతికి వచ్చిన ఇండిగో విమానాలు కూడా సుమారు గంట ఆలస్యంగా నడిచాయి.

భారీ వర్షానికి తిరుపతి విమానాశ్రయం జలమయమైంది. కొత్త టెర్మినల్‌ వీఐపీ గేటు, పాత విమానాశ్రయం వీఐపీ గేటు వద్ద ప్రహరీ గోడలు కూలిపోవడంతో వర్షపు నీరు రన్‌వే పరిసరాల్లోకి చేరింది. పరిసర ప్రాంతాల్లో డ్రైనేజీ వ్యవస్థ దెబ్బతినడం కూడా నీరు నిలిచిపోవడానికి కారణమై ఉండవచ్చని భావిస్తున్నారు. రన్‌వే సమీపంలోని ప్రహరీల నుంచి నీరు లోపలికి ప్రవేశించిందని విమానాశ్రయ ఇన్‌చార్జి డైరెక్టర్‌ భూమినాథన్‌ తెలిపారు. కూలిన గోడల వద్ద తాత్కాలికంగా బారికేడ్లు ఏర్పాటు చేశామని, వారంలోపు వాటిని పునర్నిర్మిస్తామని వెల్లడించారు.