కోస్తాంధ్రలో మూడు రోజులు వర్షాలు..

నైరుతి బంగాళాఖాతంలో ఉత్తర తమిళనాడు తీరానికి సమీపంగా సముద్ర మట్టానికి 5.8 కిలోమీటర్ల ఎత్తు వరకు విస్తరించిన ఉపరితల ఆవర్తనం కొనసాగుతోంది. దీని ప్రభావంతో రానున్న మూడు రోజుల్లో కోస్తాంధ్రలో అక్కడక్కడా భారీ వర్షాలు కురిసే అవకాశం ఉందని వాతావరణ శాఖ తెలిపింది. పలు ప్రాంతాల్లో తేలికపాటి నుంచి ఓ మోస్తరు వర్షాలతో పాటు ఉరుములు, మెరుపులతో కూడిన జల్లులు పడే అవకాశం ఉందని అంచనా వేసింది. వాతావరణ పరిస్థితుల్లో మార్పులను దృష్టిలో ఉంచుకుని ప్రజలు అధికారిక వాతావరణ హెచ్చరికలను గమనించాలని సూచించింది.

మరోవైపు, ప్రస్తుత ఉపరితల ఆవర్తనం ప్రభావంతో ఈ నెల 24 లేదా 25 తేదీల్లో అండమాన్‌ ప్రాంతంలో అల్పపీడనం ఏర్పడవచ్చని కొన్ని వాతావరణ నమూనాలు అంచనా వేస్తున్నాయి. ఇది అక్టోబర్‌ 27 నాటికి వాయుగుండంగా బలపడి మధ్య బంగాళాఖాతంలోకి ప్రవేశించే అవకాశం ఉందని పేర్కొంటున్నాయి. ఆ తర్వాత రెండు రోజుల్లో తుపానుగా మారి నెలాఖరుకు ఉత్తరాంధ్ర, దక్షిణ ఒడిశా తీరాల మధ్య తీరం దాటవచ్చని కూడా అంచనాలు వెలువడుతున్నాయి. అయితే, ఇవి ప్రాథమిక అంచనాలు మాత్రమే. అల్పపీడనం ఏర్పడటం, దాని తీవ్రత, ప్రయాణ దిశ, తీరం దాటే ప్రాంతంపై ఇంకా స్పష్టత లేదు. రానున్న రెండు రోజుల్లో దీనిపై మరింత సమాచారం అందే అవకాశం ఉంది.