దిల్లీలో దసరా వేడుకలకు భారీ భద్రత

దిల్లీలో నిర్వహించనున్న దసరా వేడుకల్లో ప్రధానమంత్రి నరేంద్ర మోదీ పాల్గొననున్నారు. ఈ సందర్భంగా రావణ దహన కార్యక్రమానికి అధికారులు కట్టుదిట్టమైన భద్రతా ఏర్పాట్లు చేశారు. కేంద్ర పారామిలటరీ బలగాలు, దిల్లీ పోలీసులు, స్వాట్‌ కమాండోలతో కలిపి సుమారు 2,500 మంది సిబ్బందిని విధుల్లో మోహరించారు. ప్రధాని భద్రత కోసం మూడంచెల రక్షణ వ్యవస్థను ఏర్పాటు చేసినట్లు అధికారులు తెలిపారు. లోపలి భద్రతను ప్రత్యేక రక్షణ బృందం (ఎస్పీజీ), మధ్యస్థాయి భద్రతను ప్రధాని భద్రతా విభాగం, బయటి భద్రతను దిల్లీ పోలీసులు పర్యవేక్షించనున్నారు.

ప్రధాని మోదీ సాయంత్రం 6.30 గంటల సమయంలో వేడుకలకు హాజరుకానున్నట్లు అధికారులు వెల్లడించారు. ప్రవేశ పాస్‌లు ఉన్నవారికి మాత్రమే కార్యక్రమ ప్రాంగణంలోకి అనుమతి ఇవ్వనున్నారు. భద్రతలో భాగంగా ప్రవేశ మార్గాల వద్ద క్షుణ్ణమైన తనిఖీలు చేపట్టడంతో పాటు మెటల్‌ డిటెక్టర్లు, బ్యాగేజీ స్కానర్లను ఏర్పాటు చేశారు. ఎలాంటి అవాంఛనీయ ఘటనలు జరగకుండా భద్రతా సిబ్బంది అప్రమత్తంగా ఉంటారని డిప్యూటీ పోలీస్‌ కమిషనర్‌ రాజీవ్‌ కుమార్‌ తెలిపారు.