దసరా వేళ పాలపిట్టలకు విముక్తి.. నాలుగు పక్షులను కాపాడిన హైదరాబాద్ పోలీసులు

దసరా పండుగ సందర్భంగా తెలంగాణ రాష్ట్ర పక్షి పాలపిట్టలను ఇనుప బోనుల్లో బంధించిన ఘటనలపై హైదరాబాద్ పోలీసులు చర్యలు చేపట్టారు. పౌరుల నుంచి అందిన విశ్వసనీయ సమాచారంతో నగరంలోని పలు ప్రాంతాల్లో తనిఖీలు నిర్వహించి మొత్తం నాలుగు పాలపిట్టలను ప్రాణాలతో కాపాడినట్లు హైదరాబాద్ పోలీస్ కమిషనర్ సజ్జనర్ తెలిపారు. లంగర్‌హౌస్‌లోని బాపుఘాట్ సమీప ఆలయం వద్ద రెండు పాలపిట్టలను బోనుల నుంచి విడిపించారు. వాటిని కేబీఆర్ పార్క్‌కు సంబంధించిన అటవీ అధికారులకు అప్పగించారు. ఛత్రినాకలోని శ్రీ చిత్రగుప్త స్వామి ఆలయం సమీపంలో చెట్టుకు వేలాడదీసిన బోనులో ఉన్న మరో పాలపిట్టను, మంగళహాట్‌లోని బాలాజీనగర్ ఆలయం సమీపంలో బంధించిన ఇంకో పాలపిట్టను కూడా పోలీసులు రక్షించి అటవీ అధికారులకు అప్పగించారు.

పండుగ పేరుతో మూగప్రాణులను బంధించడం, వాటి స్వేచ్ఛను హరించి డబ్బు సంపాదించేందుకు ప్రయత్నించడం అమానవీయమని సజ్జనర్ పేర్కొన్నారు. ఇలాంటి చర్యలను ఎవరూ ప్రోత్సహించవద్దని ప్రజలకు సూచించారు. వన్యప్రాణులకు హాని కలిగించే ఘటనలు ఎక్కడైనా కనిపిస్తే వెంటనే అధికారులకు సమాచారం అందించాలని కోరారు. ఇందుకోసం 1800 425 5364, 9803338666 టోల్‌ఫ్రీ నంబర్లకు లేదా డయల్ 112కు ఫోన్ చేయవచ్చని తెలిపారు. పండుగలను బాధ్యతాయుతంగా జరుపుకుంటూ పక్షులు, ఇతర వన్యప్రాణుల స్వేచ్ఛను కాపాడాలని పోలీసులు ప్రజలకు విజ్ఞప్తి చేశారు.