ఇళ్లు ఇవ్వకపోతే మేమే దిగుతాం – లబ్ధిదారులు

యాదాద్రి భువనగిరి జిల్లా భువనగిరి పట్టణ శివారులోని సింగన్నగూడెం చౌరస్తా వద్ద నిర్మించిన డబుల్ బెడ్‌రూమ్ ఇళ్లలో లబ్ధిదారులు సామూహికంగా ప్రవేశించడం ఉద్రిక్తతకు దారితీసింది. లాటరీ ద్వారా లబ్ధిదారుల ఎంపిక జరిగి దాదాపు రెండేళ్లు గడిచినా ఇళ్ల తాళాలు అందించకపోవడంతో ఆగ్రహానికి గురైన లబ్ధిదారులు తమకు కేటాయించిన గృహాల్లోకి వెళ్లి స్వయంగా శుభ్రం చేసుకున్నారు. వెంటనే ఇళ్లను అప్పగించాలని వారు డిమాండ్ చేశారు.

ఈ ఆందోళనకు స్థానిక రాజకీయ నాయకులు మద్దతు తెలపగా, పోలీసులు మరియు రెవెన్యూ అధికారులు సంఘటన స్థలానికి చేరుకొని పరిస్థితిని సమీక్షించారు. మౌలిక వసతుల పనులు నత్తనడకన సాగుతున్నాయని, కాంట్రాక్టర్ నిర్లక్ష్యంగా వ్యవహరిస్తున్నారని లబ్ధిదారులు ఆరోపించారు. సమస్యను ఉన్నతాధికారుల దృష్టికి తీసుకెళ్లి త్వరగా పరిష్కారం చూపిస్తామని రెవెన్యూ డివిజనల్ అధికారి మాలి కృష్ణారెడ్డి హామీ ఇచ్చారు. గత ఐదు నుంచి ఆరు సంవత్సరాలుగా ఈ గృహ నిర్మాణ ప్రాజెక్టు వివిధ వివాదాలతో వార్తల్లో నిలుస్తోంది.