వైరల్ ప్రపోజల్ వీడియోపై ఆర్మీ కెప్టెన్‌కు నోటీసు...

భారత సైన్యానికి చెందిన ఓ కెప్టెన్ తన ప్రేయసికి మిలిటరీ హెలికాప్టర్ ముందు ప్రపోజ్ చేసిన వీడియో సోషల్ మీడియాలో వైరల్ కావడంతో సైన్యం స్పందించింది. పాసింగ్ అవుట్ పరేడ్ అనంతరం చిత్రీకరించిన ఈ వీడియోపై భారత సైన్యం దృష్టి సారించి, సంబంధిత అధికారిని వివరణ ఇవ్వాలని కోరినట్లు రక్షణ వర్గాలు వెల్లడించాయి. ఈ ఘటనలో సైన్య నిబంధనలు ఉల్లంఘించినట్లు భావిస్తూ ఉన్నతాధికారులు కెప్టెన్ నుంచి సమాధానం కోరినట్లు సమాచారం.

వ్యక్తిగత భావోద్వేగాలను సైన్యం అర్థం చేసుకుంటుందని, అయితే ఆ ప్రపోజల్ జరిగిన సందర్భం, ప్రదేశం సరైనవి కాదని రక్షణ వర్గాలు పేర్కొన్నాయి. ముఖ్యంగా సైనిక సామగ్రి, మిలిటరీ వనరులను వ్యక్తిగత ప్రచారం లేదా సోషల్ మీడియా కంటెంట్ కోసం వినియోగించడాన్ని భారత సైన్యం తీవ్రంగా పరిగణిస్తుందని అధికారులు స్పష్టం చేశారు. ప్రస్తుతం ఈ వ్యవహారంపై అంతర్గతంగా పరిశీలన కొనసాగుతోంది.