అమెరికా-సౌదీ అణు ఒప్పందాన్ని ఇజ్రాయెల్ అడ్డుకుంటుంది: ఇరాన్

అమెరికా-సౌదీ అరేబియా మధ్య కుదరనున్న అణు ఒప్పందాన్ని ఇజ్రాయెల్ ఖచ్చితంగా అడ్డుకుంటుందని ఇరాన్ పేర్కొంది. ఇరాన్ విదేశాంగశాఖ ప్రతినిధి ఇస్మాయిల్ మాట్లాడుతూ, పశ్చిమాసియా దేశాలకు అణు శక్తి చేరకుండా అడ్డుకోవడానికి ఇజ్రాయెల్ ఎంతవరకైనా వెళ్తుందని అన్నారు. అణుశక్తిని శాంతియుత ప్రయోజనాల కోసం వినియోగించుకోవడం ప్రతి దేశ హక్కు అని స్పష్టం చేశారు. అలాగే అమెరికా ఒత్తిడికి తాము లొంగబోమని, తమ రక్షణ కోసం అవసరమైన చర్యలు తీసుకుంటామని హెచ్చరించారు.

శాంతి లేదా యుద్ధంపై నిర్ణయం తీసుకునే అధికారం అమెరికాకు ఇవ్వబోమని ఇరాన్ స్పష్టం చేసింది. హర్మూజ్ సముద్ర మార్గం వద్ద ఉద్రిక్తతలపై స్పందిస్తూ జాతీయ ప్రయోజనాలే తమకు ముఖ్యమని తెలిపింది. ఇదిలా ఉండగా, పౌర అవసరాల కోసం సౌదీ అరేబియాకు యురేనియం అందించేందుకు అమెరికా 30 ఏళ్ల ఒప్పందానికి ఆమోదం తెలిపింది. అయితే ఇది అణ్వస్త్ర వ్యాప్తికి దారి తీయదని అమెరికా పేర్కొన్నప్పటికీ, ఈ ఒప్పందాన్ని ఇజ్రాయెల్ అడ్డుకుంటుందని ఇరాన్ అంటోంది.