రైలు ప్రయాణికులకు కీలక అలర్ట్‌

కాజీపేట–బల్లార్షా రైల్వే సెక్షన్‌లో ఆటోమేటిక్‌ బ్లాక్‌ సిగ్నలింగ్‌ వ్యవస్థను అందుబాటులోకి తీసుకొచ్చే ప్రక్రియ తుది దశకు చేరుకుంది. ఇందులో భాగంగా జమ్మికుంట–పొత్కపల్లి మధ్య 17 కిలోమీటర్ల మేర నాన్‌ ఇంటర్‌లాకింగ్‌ పనులు చేపడుతున్నారు. ఈ పనుల కారణంగా దక్షిణ మధ్య రైల్వే సికింద్రాబాద్‌ డివిజన్‌ అధికారులు ఈ నెల 10న పలు రైళ్లను పూర్తిగా, మరికొన్నింటిని పాక్షికంగా రద్దు చేయనున్నారు. దూర ప్రాంతాల సూపర్‌ఫాస్ట్‌ ఎక్స్‌ప్రెస్‌ రైళ్లను 30 నుంచి 75 నిమిషాల వరకు నియంత్రించనుండటంతో పలు రైళ్ల రాకపోకలపై ప్రభావం పడనుంది.

ఈ నెల 10న 17003/04 కాజీపేట–సిర్పూర్‌ టౌన్‌, బల్లార్షా–కాజీపేట రామగిరి మెము ఎక్స్‌ప్రెస్‌ను పూర్తిగా రద్దు చేశారు. 17033/34 భద్రాచలం రోడ్‌–బల్లార్షా, సిర్పూర్‌ టౌన్‌–భద్రాచలం రోడ్‌ సింగరేణి మెము ఎక్స్‌ప్రెస్‌ను వరంగల్‌–బల్లార్షా, సిర్పూర్‌ టౌన్‌–వరంగల్‌ మధ్య పాక్షికంగా రద్దు చేశారు. 17011/12 హైదరాబాద్‌–సిర్పూర్‌ కాగజ్‌నగర్‌–బీదర్‌ ఇంటర్‌సిటీ ఎక్స్‌ప్రెస్‌ను కాజీపేట–సిర్పూర్‌ కాగజ్‌నగర్‌ మధ్య పాక్షికంగా రద్దు చేశారు. ఈ నెల 10న సికింద్రాబాద్‌ నుంచి బయలుదేరే 17233 భాగ్యనగర్‌ ఎక్స్‌ప్రెస్‌, 67771/73 సిర్పూర్‌ టౌన్‌–కరీంనగర్‌, కరీంనగర్‌–బోధన్‌ మెము ప్యాసింజర్‌ రైలును గంటపాటు రీషెడ్యూల్‌ చేశారు. ఈ నెల 9న 22365 దానాపూర్‌–ఎస్‌ఎంవీటీ బెంగళూరు సూపర్‌ఫాస్ట్‌ ఎక్స్‌ప్రెస్‌ను 75 నిమిషాలు, 22366 ఎస్‌ఎంవీటీ బెంగళూరు–దానాపూర్‌ సూపర్‌ఫాస్ట్‌ ఎక్స్‌ప్రెస్‌ను 45 నిమిషాలు నియంత్రించనున్నారు. ఈ నెల 10న 12622 చెన్నై సెంట్రల్‌–శ్రీమాత వైష్ణోదేవి కట్రా అండమాన్‌ ట్రైవీక్లీ ఎక్స్‌ప్రెస్‌ను 30 నిమిషాలు, ఈ నెల 9న 12622 న్యూఢిల్లీ–చెన్నై సెంట్రల్‌ తమిళనాడు సూపర్‌ఫాస్ట్‌ ఎక్స్‌ప్రెస్‌ను 30 నిమిషాలు నియంత్రించనున్నారు.

కాజీపేట–జమ్మికుంట, మంచిర్యాల–సిర్పూర్‌ కాగజ్‌నగర్‌ మధ్య ఆటోమేటిక్‌ బ్లాక్‌ సిగ్నలింగ్‌ వ్యవస్థ ఇప్పటికే అందుబాటులోకి వచ్చింది. ప్రస్తుతం పెద్దపల్లి జిల్లా పరిధిలోని కొన్ని ప్రాంతాల్లో మాత్రమే పనులు మిగిలి ఉన్నాయి. జమ్మికుంట–పొత్కపల్లి మధ్య పనులు పూర్తయిన అనంతరం పొత్కపల్లి–పెద్దంపేట మధ్య పనులను రైల్వే అధికారులు వేగవంతం చేస్తున్నారు. సుమారు 235 కిలోమీటర్ల కాజీపేట–బల్లార్షా మార్గంలో ఆటోమేటిక్‌ బ్లాక్‌ సిగ్నలింగ్‌ వ్యవస్థ పూర్తిస్థాయిలో అందుబాటులోకి వస్తే రైళ్ల రాకపోకల సామర్థ్యం పెరగడంతోపాటు సిగ్నలింగ్‌ కారణంగా ఏర్పడే ఆలస్యాలు తగ్గే అవకాశం ఉంది. ఇప్పటికే ఈ మార్గంలో మూడో రైల్వే లైన్‌ పూర్తయి వినియోగంలోకి రావడంతో కొత్త సిగ్నలింగ్‌ వ్యవస్థ అందుబాటులోకి రావడం రైళ్ల రాకపోకలకు మరింత ప్రయోజనం చేకూర్చనుంది.