మహారాష్ట్రలో ఆహార భద్రతపై తనిఖీలు.. భారీగా ఆహార పదార్థాలు సీజ్

మహారాష్ట్రలో ఆహార భద్రతా ప్రమాణాల ఉల్లంఘనపై ఫుడ్ అండ్ డ్రగ్ అడ్మినిస్ట్రేషన్ (ఎఫ్‌డీఏ) అధికారులు తనిఖీలు చేపట్టారు. థానే, పుణె జిల్లాల్లో నిర్వహించిన మెరుపు దాడుల్లో సుమారు రూ.48.09 లక్షల విలువైన ఆహార పదార్థాలను స్వాధీనం చేసుకున్నారు. ఈ తనిఖీల్లో గడువు ముగిసిన, దెబ్బతిన్న ఆహార పదార్థాలను అధికారులు గుర్తించి సీజ్ చేశారు.

అక్రమంగా ఆహార పదార్థాలను విక్రయించిన వ్యవహారంలో రిలయన్స్, బ్లింకిట్, జొమాటోకు చెందిన సిబ్బందితో పాటు సంబంధిత వ్యక్తులపై చర్యలు చేపట్టినట్లు సమాచారం. ఈ కేసులో మొత్తం 10 మందిపై ఎఫ్‌ఐఆర్‌లు నమోదు చేసినట్లు నివేదికలు పేర్కొన్నాయి. వినియోగదారులకు సురక్షితమైన ఆహారం అందేలా తనిఖీలను మరింత కఠినతరం చేయడంపై అధికారులు దృష్టి సారించారు.