నర్సాపూర్ రెస్టారెంట్ ఘటనపై మంత్రి దామోదర్ ఆరా

మెదక్ జిల్లా నర్సాపూర్‌లోని వన్ ప్యాలెస్ రెస్టారెంట్‌లో భోజనం చేసిన పలువురు అస్వస్థతకు గురైన ఘటనపై రాష్ట్ర ఆరోగ్యశాఖ మంత్రి దామోదర్ రాజనర్సింహ ఆరా తీశారు. ఈ ఘటనలో యువకుడు సాయిరాం మృతి చెందడంపై తీవ్ర విచారం వ్యక్తం చేసిన మంత్రి, మృతుడి కుటుంబ సభ్యులకు ప్రగాఢ సానుభూతి తెలిపారు. అస్వస్థతకు గురై చికిత్స పొందుతున్న బాధితులకు మెరుగైన వైద్యసేవలు అందించాలని, వారి ఆరోగ్య పరిస్థితిని నిరంతరం పర్యవేక్షించాలని ఆరోగ్యశాఖ ఉన్నతాధికారులను ఆదేశించారు.

ఘటనకు గల కారణాలను గుర్తించేందుకు సమగ్ర విచారణ చేపట్టాలని, ఆహార నమూనాలను పరీక్షలకు పంపించాలని ఫుడ్ సేఫ్టీ అధికారులకు సూచించారు. ఆహార తయారీ, నిల్వ, నాణ్యత, పరిశుభ్రత ప్రమాణాలను పాటించారా లేదా అనే అంశాలను క్షుణ్ణంగా పరిశీలించాలని స్పష్టం చేశారు. నిబంధనల ఉల్లంఘన లేదా నిర్లక్ష్యం ఉన్నట్లు తేలితే బాధ్యులపై చట్టప్రకారం కఠిన చర్యలు తీసుకోవాలని ఆదేశించారు. ఇలాంటి ఘటనలు పునరావృతం కాకుండా జిల్లాలోని హోటళ్లు, రెస్టారెంట్లు, ఇతర ఆహార విక్రయ కేంద్రాల్లో తనిఖీలను ముమ్మరం చేయాలని సూచించారు.