ఫ్యాషన్‌ కాదు.. మాతృత్వానికి ప్రతిరూపం.. ‘మిస్‌ ఉగాండా’ గౌను వైరల్‌

వియత్నాంలో జరుగుతున్న మిస్‌ వరల్డ్‌ పోటీల్లో మిస్‌ ఉగాండా ట్రివియా ఎల్లీ ముహోజా ధరించిన ప్రత్యేకమైన గౌను అందరి దృష్టిని ఆకర్షించింది. సాధారణ ఫ్యాషన్‌ డ్రెస్‌లకు భిన్నంగా మాతృత్వం, ప్రసవ ప్రయాణాన్ని ప్రతిబింబించేలా ఉగాండా డిజైనర్‌ కీషా అబ్దల్లా ఈ గౌనును రూపొందించారు. ‘లేయర్స్‌ ఆఫ్‌ లైఫ్‌’ పేరుతో రూపొందిన ఈ డ్రెస్‌.. మహిళ గర్భధారణ, ప్రసవ సమయంలో ఎదుర్కొనే భావోద్వేగాలు, శారీరక పరివర్తనకు ప్రతీకగా నిలిచింది. ముఖ్యంగా సీజేరియన్‌ ప్రసవంలోని వివిధ దశలను ఈ గౌను ద్వారా ప్రతిబింబించే ప్రయత్నం చేశారు.

డిజైనర్‌ వివరాల ప్రకారం.. మహిళ శరీరంలోని పొరలకు ప్రతీకగా పీచ్‌, గోల్డ్‌, కోరల్‌, రెడ్‌, మెరూన్‌, బర్గండీ రంగులను గౌనులో ఉపయోగించారు. గౌనులోని కదలికలు మాతృత్వంతో వచ్చే భావోద్వేగాలు, జీవితంలో చోటుచేసుకునే పరివర్తనను సూచించేలా డిజైన్‌ చేశారు. ఎల్లీ ముహోజా ఈ గౌనుతో ర్యాంప్‌పై నడిచిన ఫొటోలు ప్రస్తుతం సోషల్‌ మీడియాలో వైరల్‌గా మారాయి. అంతర్జాతీయ వేదికపై ఫ్యాషన్‌ ద్వారా మాతృత్వంపై అర్థవంతమైన సందేశాన్ని అందించిన డిజైనర్‌ కీషా అబ్దల్లాపై ప్రశంసలు వెల్లువెత్తుతున్నాయి.