ఆధునిక టెర్మినల్‌.. కనెక్టివిటీ కరువు.. చర్లపల్లిలో ప్రయాణికుల అవస్థలు

ఆధునిక సదుపాయాలతో నిర్మించిన చర్లపల్లి రైల్వే టెర్మినల్‌కు చేరుకోవడానికి సరైన రవాణా సదుపాయాలు లేక ప్రయాణికులు తీవ్ర ఇబ్బందులు ఎదుర్కొంటున్నారు. 2025 జనవరి 6న ప్రధాని నరేంద్ర మోదీ ప్రారంభించిన ఈ టెర్మినల్‌ నుంచి కోల్‌కతా, చెన్నై, బెంగళూరు వంటి నగరాలకు రైళ్లు అందుబాటులో ఉన్నప్పటికీ.. నగరంలోని వివిధ ప్రాంతాల నుంచి స్టేషన్‌కు చేరుకోవడం కష్టంగా మారింది. ముఖ్యంగా లింగంపల్లి, కూకట్‌పల్లి వంటి ప్రాంతాల ప్రయాణికులకు లోకల్‌ రైళ్లు, ఆర్టీసీ బస్సుల కనెక్టివిటీ కొరత సమస్యగా మారింది. పంజాగుట్ట నుంచి చర్లపల్లికి వెళ్లేందుకు క్యాబ్‌కు సుమారు రూ.450, ఆటోకు రూ.350 వరకు ఖర్చవుతోందని ప్రయాణికులు చెబుతున్నారు. బస్సులు ట్రాఫిక్‌లో చిక్కుకోవడం, ప్రత్యామ్నాయ రవాణా మార్గాలు పరిమితంగా ఉండటంతో ప్రైవేట్‌ వాహనాలపై ఆధారపడాల్సి వస్తోందని ఆవేదన వ్యక్తం చేస్తున్నారు.

చర్లపల్లి టెర్మినల్‌ వినియోగం పెరగాలంటే చివరి మైలు కనెక్టివిటీని మెరుగుపరచాలని ప్రయాణికులు సూచిస్తున్నారు. ప్రధాన రైళ్ల రాకపోకల సమయాలకు అనుగుణంగా ఫీడర్‌ రైళ్లు నడపడంతో పాటు, మెహిదీపట్నం, బోరబండ వంటి ప్రాంతాల నుంచి ప్రత్యేక బస్సులు ఏర్పాటు చేయాలని కోరుతున్నారు. ఎంఎంటీఎస్‌ సర్వీసులను పెంచడం, ఎల్‌బీనగర్‌ నుంచి రైళ్ల సమయాలకు అనుగుణంగా బస్సులు నడపడం వంటి ప్రతిపాదనలు చేస్తున్నారు. మరోవైపు, లింగంపల్లి నుంచి రెండు జతల ఎంఎంటీఎస్‌ రైళ్లు నడుస్తున్నాయని దక్షిణ మధ్య రైల్వే సీపీఆర్వో శ్రీధర్‌ తెలిపారు. సికింద్రాబాద్‌ నుంచి మరిన్ని రైళ్లను నడిపేందుకు సాంకేతిక సమస్యలు ఉన్నాయని, రైల్వే లైన్ల విస్తరణ పనులు పూర్తయితే సర్వీసులను పెంచే అవకాశం ఉంటుందని వివరించారు.