డ్రైవింగ్ లైసెన్స్ నిబంధనల్లో మార్పులు..ఇవే!

రోడ్డు భద్రతను మెరుగుపరచడంతో పాటు డ్రైవింగ్ లైసెన్స్‌కు సంబంధించిన కొన్ని సేవలను సులభతరం చేసే లక్ష్యంతో కేంద్ర రోడ్డు రవాణా, రహదారుల మంత్రిత్వ శాఖ కొత్త ప్రతిపాదనలను రూపొందించింది. ముసాయిదా నోటిఫికేషన్ ప్రకారం, సురక్షిత డ్రైవింగ్ ట్యుటోరియల్ పరీక్షలో ప్రస్తుతం ఉన్న 60 శాతం ఉత్తీర్ణత మార్కులను 75 శాతానికి పెంచాలని ప్రతిపాదించారు. ఈ ట్యుటోరియల్ కనీసం 30 నిమిషాల పాటు కొనసాగనుంది. ఆధార్ ధ్రువీకరణ అనంతరం నిర్దిష్ట ఆన్‌లైన్ సేవలకు ఫీజు మినహాయింపు కల్పించే ప్రతిపాదన కూడా ఉంది. డ్రైవింగ్‌పై అవగాహన పెంచడం, పరీక్షా విధానాన్ని మరింత కఠినంగా, పారదర్శకంగా మార్చడం ఈ మార్పుల ప్రధాన లక్ష్యాలు.

లైసెన్స్‌పై పేరు లేదా చిరునామా మార్పు కోసం వచ్చే దరఖాస్తులను 15 రోజుల్లోగా ఆమోదించడం లేదా తిరస్కరించడం చేయాలని ప్రతిపాదించారు. దరఖాస్తును తిరస్కరిస్తే అందుకు కారణాలను తెలియజేయాలి. చిరునామా మార్పు దరఖాస్తుపై 30 రోజుల్లోగా నిర్ణయం తీసుకోకపోతే, ప్రతిపాదన ప్రకారం దానిని ఆమోదించినట్లుగా పరిగణిస్తారు. గుర్తింపు, వయస్సు, నివాస ధ్రువీకరణకు ఆధార్, పాస్‌పోర్టు, ఓటరు గుర్తింపు కార్డు, నిర్దిష్ట విద్యా ధ్రువపత్రాలు, జనన ధ్రువీకరణ పత్రాలను ఉపయోగించవచ్చు. మూడు నెలల్లోపు జారీ చేసిన విద్యుత్, గ్యాస్ బిల్లులను చిరునామా ధ్రువీకరణకు సమర్పించవచ్చు. ఎల్‌ఐసీ పాలసీ పత్రాలను గుర్తింపు లేదా నివాస ధ్రువీకరణగా అంగీకరించబోరని ముసాయిదాలో పేర్కొన్నారు. లైసెన్స్ రెన్యువల్, డూప్లికేట్ లైసెన్స్, కొత్త వాహన తరగతి జోడింపు, వ్యక్తిగత వివరాల మార్పు వంటి సేవలకు ఒకే దరఖాస్తు ఫారాన్ని ప్రవేశపెట్టాలని ప్రతిపాదించారు. వివరాలను సారథి పోర్టల్ నుంచి ఎలక్ట్రానిక్ విధానంలో సేకరిస్తారు. లైసెన్స్‌లోని వాహన తరగతిని తొలగించే దరఖాస్తును ఏడు రోజుల్లో పూర్తి చేయాలని, ఆ తరగతిని శాశ్వతంగా తొలగించిన తర్వాత ఏడాది పాటు దానికి సంబంధించిన లెర్నర్ లేదా డ్రైవింగ్ లైసెన్స్ పొందేందుకు అర్హత ఉండదని ప్రతిపాదించారు. ఈ ముసాయిదాపై అభ్యంతరాలు, సూచనలు తెలియజేయడానికి 30 రోజుల గడువు ఇచ్చారు. తుది నోటిఫికేషన్ వెలువడిన తర్వాతే కొత్త నిబంధనలు అమల్లోకి వస్తాయి.