పవన్ కల్యాణ్ రాజీనామాపై ప్రచారం...నకిలీ వాట్సాప్ ఛానల్‌కు కార్యాలయం హెచ్చరిక!

ఆంధ్రప్రదేశ్ ఉప ముఖ్యమంత్రి పవన్ కళ్యాణ్ రాజీనామా చేస్తున్నారంటూ వచ్చిన వార్తల నేపథ్యంలో ఆయన కార్యాలయం స్పందించింది. ‘Deputy CMO, Andhra Pradesh’ పేరుతో నిర్వహిస్తున్న వాట్సాప్ ఛానల్‌కు ఉప ముఖ్యమంత్రి కార్యాలయంతో ఎలాంటి అధికారిక సంబంధం లేదని స్పష్టం చేసింది. ఈ అనధికారిక ఛానల్ ద్వారా కార్యాలయం పేరు, గుర్తింపును దుర్వినియోగం చేస్తూ ప్రజలను తప్పుదోవ పట్టించే సమాచారాన్ని, సంబంధం లేని ఇతర అంశాలను ప్రచారం చేస్తున్నారని తెలిపింది. ప్రభుత్వ కార్యాలయానికి చెందిన అధికారిక ఛానల్‌గా తప్పుడు గుర్తింపుతో వ్యవహరించడం, ఉద్దేశపూర్వకంగా తప్పుడు సమాచారాన్ని వ్యాప్తి చేయడం ఏమాత్రం ఆమోదయోగ్యం కాదని హెచ్చరించింది. ఇటువంటి చర్యలను ఉప ముఖ్యమంత్రి కార్యాలయం తీవ్రంగా పరిగణిస్తుందని స్పష్టం చేసింది.

ఈ నకిలీ వాట్సాప్ ఛానల్ వ్యవహారంలో ఎఫ్‌ఐఆర్ నమోదు చేసేందుకు అవసరమైన చర్యలు చేపట్టినట్లు పవన్ కళ్యాణ్ కార్యాలయం వెల్లడించింది. ఈ వ్యవహారానికి బాధ్యులైన వారిపై చట్టపరమైన చర్యలు తీసుకుంటామని హెచ్చరించింది. ప్రజలు ఈ అనధికారిక ఛానల్‌ను విశ్వసించవద్దని, అనుసరించవద్దని, అందులో వచ్చే సమాచారాన్ని ఇతరులకు ఫార్వర్డ్ చేయవద్దని సూచించింది. ఉప ముఖ్యమంత్రి కార్యాలయానికి సంబంధించిన ప్రామాణిక సమాచారం, అధికారిక తాజా వివరాల కోసం ధృవీకరించిన సోషల్ మీడియా ఖాతాలు, అధికారిక వాట్సాప్ ఛానల్‌ను మాత్రమే అనుసరించాలని విజ్ఞప్తి చేసింది. ప్రభుత్వ కార్యాలయాల పేర్లు, గుర్తింపులను దుర్వినియోగం చేసే వారిపై చట్టప్రకారం చర్యలు తీసుకుంటామని మరోసారి స్పష్టం చేసింది.