ఏపీలో తపాలా శాఖ సర్వర్‌లో అంతరాయం

ఆంధ్రప్రదేశ్‌లో తపాలా శాఖ సర్వర్‌లో సాంకేతిక అంతరాయం ఏర్పడటంతో సోమవారం ఉదయం నుంచి పలు పోస్టల్ సేవలు నిలిచిపోయాయి. తపాలా శాఖకు సంబంధించిన బ్యాంకింగ్ సేవలు మినహా స్పీడ్ పోస్ట్, రిజిస్టర్డ్ పోస్ట్, పార్సిల్ బుకింగ్ వంటి ఇతర సేవలు అందుబాటులో లేకపోవడంతో ప్రజలు ఇబ్బందులు ఎదుర్కొంటున్నారు.

విజయవాడ ప్రధాన తపాలా కార్యాలయంతో పాటు బకింగ్‌హాం పోస్ట్ ఆఫీస్, ఇతర పోస్టాఫీసుల్లో పార్సిళ్లు, స్పీడ్ పోస్ట్, రిజిస్టర్డ్ పోస్టు పంపేందుకు వచ్చిన ప్రజలు సర్వర్ పునరుద్ధరణ కోసం వేచి చూస్తున్నారు. సర్వర్ ఎప్పుడు అందుబాటులోకి వస్తుందనే విషయంపై స్పష్టత లేదని ఉద్యోగులు చెబుతున్నారు. దేశవ్యాప్తంగా ఇదే తరహా సాంకేతిక సమస్య ఉన్నట్లు వారు పేర్కొంటున్నారు.