మంగోలియా అధ్యక్షుడి ఫిట్‌నెస్‌పై సోషల్ మీడియాలో ప్రశంసలు

వెయిట్‌ లిఫ్టింగ్‌ క్రీడాకారులు 100 కేజీల బరువును ఎత్తడం సాధారణమే అయినా, దేశాధ్యక్షుడు అంతే బరువును బెంచ్‌ ప్రెస్‌ చేయడం మాత్రం అందరినీ ఆశ్చర్యపరిచింది. మంగోలియా అధ్యక్షుడు ఉఖ్నాగిన్‌ ఖురెల్‌సుఖ్‌ ఓ సైనిక విభాగాన్ని సందర్శించిన సమయంలో అక్కడి జిమ్‌లో వర్కౌట్‌ చేశారు. సూట్‌ జాకెట్‌ను పక్కన పెట్టి బెంచ్‌పై పడుకున్న ఆయన 100 కేజీల బరువును ఏకధాటిగా 20 సార్లు ఎత్తారు. దీంతో ఆయన బలం, ఫిట్‌నెస్‌ చూసి అక్కడున్నవారు ఆశ్చర్యపోయారు. ఈ వీడియో ప్రస్తుతం సామాజిక మాధ్యమాల్లో వైరల్‌గా మారింది.

2021 నుంచి అధ్యక్షుడిగా కొనసాగుతున్న ఖురెల్‌సుఖ్‌ గతంలో మంగోలియా సైన్యంలో అధికారిగా పనిచేశారు. ఆయనకు బాడీబిల్డింగ్‌, మార్షల్‌ ఆర్ట్స్‌లో మంచి పట్టు ఉంది. అంతేకాకుండా ఓ రాక్‌ బ్యాండ్‌లో గిటారిస్ట్‌గా కూడా ఉన్నారు. మంగోలియాలో హార్లే-డేవిడ్‌సన్‌ అభిమానుల క్లబ్‌ను స్థాపించిన ఆయనకు ఫిట్‌నెస్‌పై ప్రత్యేక ఆసక్తి ఉంది. వీడియోను చూసిన పలువురు ఆయన శక్తి, క్రమశిక్షణను ప్రశంసిస్తున్నారు. బార్‌పై ఉన్న బరువుపై కొందరు సందేహాలు వ్యక్తం చేసినప్పటికీ, ఆయన 100 కేజీల బరువును ఎత్తినట్లు నివేదికలు పేర్కొన్నాయి.